Një person i armatosur hapi zjarr në një shtëpi të moshuarish në Kroaci të hënën, duke vrarë të paktën 6 persona.

Transmetuesi shtetëror HRT tha se një person i armatosur i paidentifikuar hyri në një shtëpi të moshuarish në Daruvar – rreth 130 kilometra në lindje të Zagrebit – dhe filloi të qëllonte.

Të paktën 6 u vranë dhe 4 të tjerë u plagosën gjatë incidentit, tha HRT.

Policia tha se ishte informuar për incidentin në orën 10:10 të mëngjesit dhe konfirmoi se i dyshuari kishte hyrë në shtëpinë e të moshuarve dhe kishte përdorur një armë zjarri.

“Personi i lidhur me kryerjen e krimit është nën arrest policor”, tha policia në një deklaratë.

Numri i të vdekurve u konfirmua më vonë nga kryeministri Andrej Plenkoviç, i cili bëri thirrje për një hetim të plotë nga zyrtarët përkatës.

“Ne jemi të tmerruar nga vrasja e pesë personave në shtëpinë e të moshuarve në Daruvar,” tha Plenkoviç në mediat sociale.

Kreu i një institucioni rajonal të kujdesit emergjent, Nenad Mrzlecki, tha për mediat lokale se ekipet mjekësore gjetën 5 të vdekur në vendngjarje dhe 4 të tjerë të plagosur, të cilët u dërguan menjëherë në spitalet lokale.

Një person i gjashtë vdiq më vonë nga plagët në spital.

“Ekipet tona janë ende në terren dhe prioritet është t’u ofrojmë të gjithëve ndihmën e nevojshme, pasi kjo të bëhet do të dimë të dhënat e sakta për numrin e viktimave”, tha ai.

Gazeta kroate Jutarnji list e përshkroi të dyshuarin si një “oficer policie në pension 51-vjeç” që vrau nënën e tij së bashku me të moshuarit e tjerë dhe një kujdestare.

Daruvar, një qytet me rreth 7,000 banorë, ka qenë prej kohësh një destinacion popullor falë burimeve termale të zonës.

Të shtënat me armë në vendin ballkanik janë të rralla.

Vitin e kaluar në Serbinë fqinje, vendi u trondit nga të shtëna masive të njëpasnjëshme, duke përfshirë një masakër në një shkollë në kryeqytetin në Beograd, ku u vranë 10 persona.

(A.A/BalkanWeb)

Burimi informacionit @BalkanWeb: Lexo me shume ne : Bota Sot News botasot.co