Një peshk i kapur nga një peshkatar ka nxitur besëtytninë që lidhet me një lloj peshku që shfaqet në ujërat e cekëta vetëm kur pritet një fatkeqësi e ardhshme.

Një burrë në Filipine kapi një peshk rrem, i njohur si peshku i “fundit të botës”, vetëm disa orë përpara se tërmeti vdekjeprurës prej 7.4 ballësh të trondiste Tajvanin. Tërmeti u konsiderua si më i fuqishmi në 25 vitet e fundit.

Peshku rrem jeton nën thellësi prej 1000 metrash në oqean, megjithatë, sipas besimeve japoneze, ai vjen në ujëra të cekëta kur ka një dukuri sizmike, sipas Metro News. Raporti gjithashtu vuri në dukje se peshku u gjet në ishullin Kalanggaman, rreth 900 milje në jug të epiqendrës së Hualien.

Ndërsa fliste për kapjen, Brenjeng Caayon tha se nuk ishte rastësi, duke e lidhur atë me besëtytninë dhe duke thënë: “Ky është një ogur i keq”.

“Dhe mund të jetë një ogur sepse pikërisht këtë mëngjes një tërmet tronditi Tajvanin. Nuk e besoja më parë, por tani kam filluar ta besoj. Unë zotëroj varkën e peshkimit dhe kisha tre peshkatarë në bord. Ekuipazhi nuk e njihte llojin e peshkut – ishte hera e parë që e shihnin atë.”

Tërmeti në Tajvan vrau të paktën 9 persona dhe plagosi mbi 1000 të tjerë.

Besëtytnia e tërmetit bazohet në mitologjinë japoneze, e cila thotë se peshku rrem do të ngrihet qëllimisht në sipërfaqe dhe do të dalë në plazh përpara një tërmeti të afërt.

“Kur e pashë, e njoha menjëherë; kam parë një peshk rrem më parë, por jo kaq të madh”, tha 53-vjeçari.

Peshku ishte gati 1.5 metër i gjatë dhe peshonte 15 kg.

Frika nga peshku rrem u shtua gjatë tërmetit dhe cunamit të Fukushimës të vitit 2011, pasi dhjetëra nga këto krijesa detare kishin dalë në breg në dy vitet para ngjarjeve shkatërruese.

Burimi informacionit @BalkanWeb: Lexo me shume ne : Bota Sot News botasot.co