SHBA dhe tre nga aleatët e saj, Japonia, Australia dhe Filipinet kanë njoftuar një stërvitje të përbashkët ushtarake në ujërat e diskutueshme të Detit të Kinës Jugore, duke rritur potencialisht tensionet me Pekinin, ndërsa ata kërkojnë të demonstrojnë përkushtimin e tyre për mbrojtjen e rendit ndërkombëtar.

Grupi i udhëhequr nga SHBA do të zhvillojë një “aktivitet bashkëpunimi detar”, i pari i tij në një seri stërvitjesh të përbashkëta, të dielën, sipas një deklarate të lëshuar nga shefat e mbrojtjes të katër vendeve.

Stërvitja do të përfshijë forcat detare dhe ajrore dhe do të organizohet në ujërat e pretenduara nga Kina dhe Filipinet.

“Çdo vend duhet të jetë i lirë të kryejë operacione të ligjshme ajrore dhe detare”, tha në deklaratë shefi i mbrojtjes së SHBA-së, Lloyd Austin.

“Këto aktivitete me aleatët tanë Australinë, Japoninë dhe Filipinet nënvizojnë angazhimin tonë të përbashkët për të garantuar që të gjitha vendet të jenë të lira të fluturojnë, lundrojnë dhe operojnë kudo që e lejon ligji ndërkombëtar. Operacionet tona së bashku mbështesin paqen dhe stabilitetin në zemër të vizionit tonë të përbashkët për një rajon të lirë dhe të hapur”, tha ai.

Njoftimi vjen pasi ushtritë amerikane dhe kineze zhvilluan bisedime në Hawai në fillim të kësaj jave, takimi i tyre i parë i tillë që nga viti 2021,  për të diskutuar masat e sigurisë për të shmangur incidentet e rrezikshme kur forcat e tyre veprojnë në afërsi.

Ministria kineze e Mbrojtjes theksoi se “kundërshton me vendosmëri çdo veprim që rrezikon sovranitetin e saj nën maskën e lirisë, lundrimit dhe fluturimit”.

Burimi informacionit @BalkanWeb: Lexo me shume ne : Bota Sot News botasot.co