Aktivistja italiane Ilaria Salis u lirua nga arresti shtëpiak në Budapest pasi u zgjodh anëtare e Parlamentit Evropian (PE) në fundjavë, tha avokati i saj Gyorgy Magyar për Reuters të premten.

Anëtarët e Parlamentit Evropian kanë imunitet të fortë ligjor nga ndjekja penale, edhe nëse akuzat kanë të bëjnë me veprat e supozuara të kryera përpara zgjedhjes së tyre.

Mësuesja 39-vjeçare u akuzua vitin e kaluar në Hungari për pjesëmarrje në sulmet e një grupi antifashist ndaj njerëzve që ata i konsideronin si aktivistë të së djathtës ekstreme. Salis dhe familja e saj kanë thënë se ajo është e pafajshme.

Gjykata e Budapestit do t’i kërkojë Parlamentit Evropian të pezullojë imunitetin e Salis pasi ajo akuzohet për krime të dhunshme dhe çështja e saj është në vazhdim, tha gjykata në një deklaratë të premten.

Policia ka hequr byzylykun elektronik nga kyçi i Salis, tha avokati i saj. Babai i Salis pritej të mbërrinte në Budapest më vonë të premten për ta marrë atë në Itali, shtoi Magyar.

Salis është mbajtur në Hungari për më shumë se një vit në një rast që bëri që Aleanca Italiane e Gjelbër dhe e Majtë ta emëronte atë në mesin e kandidatëve të tyre në votimin evropian.

Burimi informacionit @BalkanWeb: Lexo me shume ne : Bota Sot News botasot.co