Sekretari amerikan i Shtetit Antony Blinken dënoi “thellimin e bashkëpunimit ushtarak” midis Rusisë dhe Koresë së Veriut, tha Departamenti i Shtetit.

Në një telefonatë me ministrin e Jashtëm të Koresë së Jugut Cho Tae-yul, Blinken ripohoi rëndësinë e aleancës “të hekurt” SHBA-Kore e Jugut në promovimin e paqes, sigurisë dhe prosperitetit në mbarë botën, tha zëdhënësi Matthew Miller në një deklaratë.

“Sekretari dënoi thellimin e bashkëpunimit ushtarak midis DPRK (Republika Popullore Demokratike e Koresë) dhe Rusisë, duke përfshirë transferimet e vazhdueshme të armëve që shkelin rezolutat e shumta të Këshillit të Sigurimit të OKB-së”, thuhet në deklaratë.

“Sekretari Blinken dhe ministri i Jashtëm Cho ranë dakord gjithashtu të vazhdojnë të punojnë së bashku për të adresuar sfidat komplekse dhe në zhvillim të sigurisë të paraqitura nga DPRK, si dhe për të mbështetur paqen dhe stabilitetin në Detin e Kinës Jugore,” shtoi ai.

Blinken falënderoi gjithashtu Cho për mbështetjen e vazhdueshme të Koresë së Jugut ndaj Ukrainës.

Telefonata erdhi pas vizitës së presidentit rus Vladimir Putin në Korenë e Veriut këtë javë, ku Moska dhe Pheniani u angazhuan për të ofruar ndihmë ushtarake për njëri-tjetrin, nëse ndonjëri prej tyre sulmohet.

(A.A/BalkanWeb)

Burimi informacionit @BalkanWeb: Lexo me shume ne : Bota Sot News botasot.co