Pesë persona të lidhur me një nga bandat më të mëdha kriminale të Ekuadorit janë burgosur për vrasjen e kandidatit presidencial Fernando Villavicencio vitin e kaluar.
Villavicencio, anëtar i asamblesë kombëtare të vendit dhe ish-gazetar, u qëllua për vdekje teksa po largohej nga një tubim i fushatës në kryeqytetin, Quito, gushtin e kaluar.
Carlos Angulo, lideri i supozuar i bandës Los Lobos dhe Laura Castilla u dënuan me 34 vjet e tetë muaj burg për drejtimin e atentatit.
Tre persona të tjerë, mes tyre edhe një grua, u dënuan me 12 vjet nga gjykata në Quito për ndihmën në organizimin dhe ekzekutimin e planit.
Prokurorët pretenduan se Angulo – i njohur gjerësisht si “i padukshmi” – urdhëroi goditjen nga burgu i Kuitos në të cilin ai ishte i ndaluar.
Ai i mohoi akuzat, duke pretenduar se po bëhej “kurban”.
Më shumë se 70 njerëz dhanë dëshmitë e tyre gjatë gjyqit, duke përfshirë një dëshmitar kyç i cili tha se bandës i ishin ofruar më shumë se 200,000 dollarë (154,000 £) për të vrarë zotin Villavicencio.
Në javët para zgjedhjeve, politikani kishte marrë kërcënime me vdekje, por ai vazhdoi të bënte fushatë dhe u qëllua nga një grup sulmuesish më 9 gusht jashtë një shkolle në veri të Kuitos.
Prokurorët thanë gjatë gjyqit se një nga personat e përfshirë në atentat u qëllua për vdekje në një konfrontim me policinë në vendngjarje.
E veja e zotit Villavicencio, Veronica Sarauz, e mirëpriti vendimin, por tha se shënoi vetëm fillimin e një rruge të gjatë për të përcaktuar të gjithë historinë pas vdekjes së burrit të saj.
Burimi informacionit @BalkanWeb: Lexo me shume ne : Bota Sot News botasot.co
