Misteri rreth gjashtë turistëve të vdekur në një hotel luksoz në kryeqytetin tajlandez Bangkok është zgjidhur. Ishte një vrasje pesëfishe me çaj të nxehtë, ku ishte hedhur helm. Më pas, autori i dyshuar i krimit, ka vrarë edhe veten.
Trupat e tre burrave dhe tre grave (37 deri në 56 vjeç) nga Vietnami u zbuluan nga një shërbëtore e dhomës në një dhomë në katin e pestë të hotelit luksoz Grand Hyatt Erawan të martën në mbrëmje. Nuk kishte asnjë gjurmë dhune. Me shpejtësi u përjashtua edhe një tentativë grabitjeje.
Në tavolinë kishte ende ushqim të paprekur. Të gjitha filxhanët e çajit dhe kafesë në dhomë ishin të përdorura.
Pas marrjes në pyetje të dëshmitarëve dhe vajzës së njërit prej të viktimave, policia tajlandeze ka njoftuar tani rezultatet e para të hetimit.
“Bëhej fjalë për borxhe të larta”, tha gjeneralmajor Theeradej Thammasutee. Të gjashtë të vdekurit ishin partnerë biznesi. Sherine Chong (56), një grua vietnameze me pasaportë amerikane, u identifikua si vrasëse.
Chong dhe pesë të vdekurit e tjerë kishin investuar së bashku në një projekt të madh ndërtimi në Vietnam. Por projekti dështoi, Sherine Chong u padit nga pesë të tjerët dhe do të dilte në gjykatë në Vietnam pas dy javësh.
Për të shmangur këtë gjyq, Chong ftoi pesë viktimat e tjera në një shlyerje borxhi në Tajlandë. Gjashtë pjesëmarrësit udhëtuan për në Bangkok më 13 dhe 14 korrik, duke u akomoduar në dhomat 708, 709, 726 dhe 727 në katin e 7-të të Hotel Grand Hyatt Erawan.
Dalja nga të gjitha dhomat ishte planifikuar për në 15 korrik.
Por negociatat me sa duket nuk ishin të suksesshme. Ditën e nisjes, me pretekstin se donte të fliste për herë të fundit dhe të kërkonte një zgjidhje, Chong ftoi të pesë kreditorët për një vakt në dhomën 502 në katin e 5-të. Nga atje, ajo porositi shërbim në dhomë për ushqim për të gjithë dhe dy termosa argjendi me ujë të nxehtë për të bërë çaj. Ajo e spërkati atë me cianid (kripë e acidit hidrocianik) – një dënim me vdekje.
Grupi Balkanweb
Burimi informacionit @BalkanWeb: Lexo me shume ne : Bota Sot News botasot.co
