Organizatorët e Lojërave Olimpike kanë kërkuar falje pasi që sportistët e Koresë së Jugut gabimisht u prezantuan si sportistë të Koresë Veriore gjatë ceremonisë hapëse të mbajtur të premten në Paris, raporton “BBC”.
Ndërsa ekipi po parakalonte duke valuar flamujt e Koresë Jugore, si spikeri francez ashtu edhe ai anglez i prezantoi si sportistë të “Republikës Demokratike Popullore të Koresë”, emri zyrtar i Koresë Veriore.
Emri i njëjtë më pas u përdor – saktë – kur delegacioni i Koresë së Veriut lundroi përgjatë lumit Sena.
Dy Koretë janë ndarë që nga fundi i Luftës së Dytë Botërore, ndërsa tensionet mes dy shteteve kanë përshkallëzuar së fundi.
Ministria e Sportit e Koresë së Jugut ka thënë se planifikon të dërgojë “ankesë të fuqishme te Franca në nivel qeveritar” për shkak të gafës.
Në komunikatë thuhet se zëvendësministri i dytë i sportit, Jan Mi-Ran, ka kërkuar një takim me kreun e Komitetit Olimpik Ndërkombëtar, Thomas Bach.
Komiteti Olimpik Ndërkombëtar (IOC) ka kërkuar falje publike në llogarinë e saj zyrtare në gjuhën koreane.
Grupi Balkanweb
Burimi informacionit @BalkanWeb: Lexo me shume ne : Bota Sot News botasot.co
