Mësimi i gjuhës dhe kulturës së popujve të tjerë i bashkon njerëzit dhe i largon stereotipet, pajtohen pjesëmarrësit e Seminarit Ndërkombëtar për Gjuhën, Letërsinë dhe Kulturën Shqiptare (Seminari i Albanologjisë), i cili po mbahet në Prishtinë.

20-vjeçarja Jovana Gogiç nga Kraljeva, studente e vitit të tretë në Departamentin e Studimeve Shqipe në Beograd, po merr pjesë për herë të parë në Seminarin e Albanologjisë.

Ajo tregon se familja e saj vjen nga Kosova dhe se me gjuhën shqipe është e ekspozuar që në fëmijëri. Siç thotë ajo, gjatë gjithë jetës së saj ishte tërhequr për ta mësuar gjuhën shqipe, ndaj pas mbarimit të gjimnazit gjuhësor vendosi ta studiojë gjuhën shqipe. Ajo beson se shqipja nuk është aq e vështirë për t’u mësuar, megjithëse ka disa veçori unike.

Siç thotë Jovana, në Prishtinë ka një atmosferë shumë të mirë si në kursin e shqipes, ashtu edhe në konviktet studentore ku janë vendosur pjesëmarrësit e këtij seminari. Me studentë vendas ajo komunikon në shqip, anglisht dhe serbisht.
“Duke qenë se kisha ardhur më parë, por jo në Prishtinë, isha në Prizren dhe Hoçë të Madhe me familjen time, nuk kisha frikë, por isha pak e brengosur nga konflikti eventual me njerëzit këtu, edhe pse asgjë e veçantë”, thotë ajo.

Jovana beson se bashkëpunimi mes popujve dhe shteteve është i nevojshëm jo vetëm për politikën, por edhe për zhvillimin e shoqërisë dhe ekonomisë.

“Është thjesht shumë e rëndësishme që ne të mbajmë një lloj bashkëpunimi dhe të largojmë stereotipet rreth asaj energjie negative dhe gjithë asaj urrejtjeje që ka vite që qarkullon”, thotë Jovana.

Gjimnazisti 18-vjeçar Lev Sokliq nga Lubjana, Slloveni, është për herë të dytë pjesëmarrës i këtij seminari, për të cilin tha se ka dëgjuar në kursin e gjuhës shqipe në Lubjanë.

“Përshtypjet janë të mira, flasim shqip dhe studiojmë. Prishtina është një qytet i madh, i gjallë, me të rinj, kështu që më pëlqen shumë”, thotë Levi, duke përshëndetur në gjuhën shqipe: “Mirëdita, si jeni? Ejani në Prishtinë, këtu është shumë mirë”.

Gjuhën shqipe ai e ka dëgjuar për herë të parë gjatë shkollimit fillor, pasi në paralele kishte hasur në nxënës shqiptarë. Ai thotë se dëgjon edhe muzikë shqipe, nga e cila veçon muzikën popullore.

Jakub Stepaniuk nga Polonia, i cili aktualisht jeton në Bruksel, vitin e kaluar mori diplomën master në studimet e Evropës Juglindore me fokus në politikë, drejtësi dhe marrëdhënie ndërkombëtare. Ai flet dhjetë gjuhë, përfshirë turqishten, e cila për të ishte më e vështira për ta mësuar.

Jakub, i cili është për herë të dytë në Seminarin e Albanologjisë në Prishtinë, flet shumë mirë serbisht dhe tani ai mund të komunikojë edhe në gjuhën shqipe.

“Gjuhën shqipe e kam filluar ta mësoj në Beograd, ku kam qenë në programin Erasmus në vitin 2019. Kam studiuar shqip për një semestër në Departamentin e Studimeve Shqiptare. Më pas studiova në Fakultetin e Shkencave Politike dhe si lëndë zgjodha të studioj gjuhën shqipe për një hulumtim në Mitrovicë, sepse mendova se do të ishte e dobishme të flisja edhe serbisht edhe shqip”, thotë Jakub në një shqipe pothuajse të rrjedhshme.

Jakub beson se serbët dhe shqiptarët duhet të bashkëpunojnë dhe se duhet të nisin nga niveli joformal, me komunikimin e njerëzve të thjeshtë dhe pastaj të kalojnë në nivelin e lartë politik, që është më i ndërlikuari.

Më 19 gusht, në Universitetin e Prishtinës filloi edicioni i 42-të i Seminarit Ndërkombëtar për Gjuhën, Letërsinë dhe Kulturën Shqiptare. Seminari, i cili do të zgjasë deri më 30 gusht, ka mbledhur këtë vit rreth 300 studentë dhe studiues nga vende të ndryshme të botës. Ata ndjekin kurse të gjuhës shqipe dhe zhvillojnë kërkimin e tyre shkencor në fushën e albanologjisë./ AA

Burimi informacionit @BalkanWeb: Lexo me shume ne : Bota Sot News botasot.co