![OKB: Shqetësime për të drejtat e njeriut në rastin e themeluesit të rrjetit Telegram 2 okb shqetesime per te drejtat e njeriut ne rastin e themeluesit te rrjetit telegram](https://botasot.co/wp-content/uploads/2024/09/okb-shqetesime-per-te-drejtat-e-njeriut-ne-rastin-e-themeluesit-te-rrjetit-telegram.jpg)
“Ky është një rast shumë kompleks, që ngre shumë shqetësime lidhur me të drejtat e njeriut”, tha Ravina Shamdasani, zëdhënëse e Zyrës së OKB-së për të Drejtat e Njeriut.
Ajo tha gjatë një konference shtypi se agjencia me seli në Gjenevë po shqyrtonte publikimin e një dokumenti që përcakton “parametrat brenda të cilave duhet të shqyrtohen këto situata”.
Ajo përmendi gjithashtu bllokimin e kohëve të fundit të rrjetit X në Brazil. Gjykata e Lartë e Brazilit ratifikoi të hënën vendimin e një prej gjykatësve të saj për të pezulluar platformën e mediave sociale për shkelje të dyshuara juridike.
Pezullimi i rrjetit X nga Brazili “ngre gjithashtu shqetësime të ngjashme për shtetet që kanë për detyrë të sigurojnë që platformat e mediave sociale të veprojnë në bazë të ligjit që lejon lirinë e shprehjes”, por në përputhje me disa kufizime, tha zëdhënësja Shamdasani.
Ajo bëri thirrje që çdo kufizim i vendosur të jetë “proporcional” dhe “në përputhje me standardet ndërkombëtare të të drejtave të njeriut”.
“Po e ndjekim këtë rast dhe aktualisht është e vështirë që të jemi më specifikë” për rastin dhe akuzat ndaj zotit Durov, sepse Zyra e OKB-së për të Drejtat e Njeriut nuk ka qasje “tek të dhënat e plota”.
Ajo tha se shtetet duhet të jenë në gjendje të miratojnë ligje pëpr përdorimin e platformave sociale, por rregullat duhet të jenë në përputhje me ligjin ndërkombëtar për të drejtat e njeriut.
“Parimet e ligjshmërisë, domosdoshmërisë dhe proporcionalitetit, gjuha e urrejtjes, nxitja e urrejtjes apo dhunës, dezinformimi i dëmshëm, duhet të gjejnë zgjidhje”, tha ajo.
Në nëntor të vitit 2022, shefi i OKB-së për të drejtat e njeriut, Volker Turk, i shkroi pronarit të rrjetit X duke i kërkuar atij që të vendoste respektin për të drejtat e njeriut në qendër të platformës sociale.
Në një letër të hapur, ai paralajmëroi kundër përhapjes së gjuhës së urrejtjes dhe dezinformimit ndërsa theksoi nevojën për të mbrojtur privatësinë e përdoruesve./VOA
Burimi informacionit @Panorama.al: Lexo me shume ne :bota sot www.botasot.co