Ushtria ruse nisi sot stërvitjet detare dhe ajrore në shkallë të gjerë që shtrihen në të dy hemisferat, në të cilat do të marrë pjesë edhe ushtria kineze.

Stërvitja “Ocean 24” mbulon Oqeanin Paqësor dhe Arktik, Detin Mesdhe, Kaspik dhe Detin Baltik dhe përfshin mbi 400 anije luftarake, nëndetëse dhe anije ndihmëse, më shumë se 120 avionë dhe helikopterë dhe mbi 90,000 ushtarë, njoftoi Ministria Ruse e Mbrojtjes.

Stërvitjet do të zgjasin deri më 16 shtator, njoftoi ministria.

Presidenti rus Vladimir Putin u tha zyrtarëve ushtarakë se stërvitjet ishin më të mëdhatë e llojit të tyre në tre dekada dhe se luftanijet dhe avionët kinezë po marrin pjesë gjithashtu.

Kina e konfirmoi këtë dje, duke thënë se marina e të dy vendeve do të lundrojnë së bashku në Paqësor. Gjithsej 15 vende janë ftuar për të vëzhguar stërvitjet, shtoi Putin.

Udhëheqësi rus akuzoi Shtetet e Bashkuara se “po përpiqen të ruajnë me çdo kusht dominimin e tyre ushtarak dhe politik global”, duke kërkuar t’i shkaktojnë Rusisë një disfatë strategjike në luftën me Ukrainën dhe të prishin arkitekturën e vendosur të sigurisë dhe balancën e fuqisë në Azi.

“Nën pretekstin e kundërshtimit të kërcënimit të supozuar rus dhe frenimit të Republikës Popullore të Kinës, Shtetet e Bashkuara dhe satelitët e saj po rrisin praninë e tyre ushtarake pranë kufijve perëndimorë të Rusisë, në Arktik dhe në rajonin Azi-Paqësor”, tha Putin.

Rusia dhe Kina, së bashku me kritikë të tjerë të SHBA-së, si Irani, kanë lidhur politikat e tyre të jashtme për të sfiduar dhe përmbysur potencialisht rendin liberal demokratik të udhëhequr nga perëndimi.

Burimi informacionit @BalkanWeb: Lexo me shume ne : Bota Sot News botasot.co