Dyzet e shtatë tigra, tre luanë dhe një panterë kanë ngordhur në kopshtet zoologjike në Vietnamin jugor për shkak të virusit të gripit të shpendëve H5N1, tha media shtetërore.

Kafshët ngordhën në gusht dhe shtator në parkun privat të safarit My Quynh në provincën Long An dhe kopshtin zoologjik Vuon Xoai në Dong Nai, afër qytetit Ho Chi Minh, raportoi Agjencia zyrtare e Lajmeve të Vietnamit (VNA).

Sipas rezultateve të testit nga Qendra Kombëtare për Diagnozën e Shëndetit të Kafshëve, kafshët ngordhën “për shkak të virusit H5N1 të tipit A”, tha VNA.

Kopshtet zoologjike nuk pranuan të komentojnë. Asnjë anëtar i stafit të kopshtit zoologjik në kontakt të ngushtë me kafshët nuk kishte përjetuar simptoma të frymëmarrjes, shtoi raporti i VNA.

Education for Nature Vietnam (ENV), një OJQ që fokusohet në ruajtjen e jetës së egër, tha se në fund të vitit 2023 në Vietnam jetonin gjithsej 385 tigra në robëri.

Rreth 310 kafshë mbahen në 16 ferma private dhe kopshte zoologjike, ndërsa pjesa tjetër janë në objekte shtetërore.

Organizata Botërore e Shëndetësisë (OBSH) tha se që nga viti 2022, ka pasur raportime në rritje për shpërthime vdekjeprurëse midis gjitarëve të shkaktuar nga viruset e gripit, duke përfshirë H5N1.

OBSH tha se infeksionet H5N1 mund të variojnë nga të lehta në të rënda tek njerëzit dhe në disa raste mund të jenë edhe fatale.

Vietnami njoftoi OBSH-në për një vdekje njerëzore nga virusi në mars.

Në vitin 2004, dhjetëra tigra ngordhën nga gripi i shpendëve ose u vranë në fermën më të madhe të mbarështimit në botë në Tajlandë.

(A.A/BalkanWeb)

Burimi informacionit @BalkanWeb: Lexo me shume ne : Bota Sot News botasot.co