SHBA , NATO dhe Koreja e Jugut thonë se mijëra ushtarë të Koresë së Veriut janë dërguar në Rusi për stërvitje. Pheniani i ka hedhur poshtë këto “thashetheme” .
Sipas inteligjencës së Koresë së Jugut , njësitë e para elitare të trupave u nisën në fillim të tetorit për në Vladivostok dhe 3,000 koreano-veriorë aktualisht po stërviten në baza të ndryshme ushtarake në Lindjen e Largët Ruse, të veshur me uniforma ruse.
Çdo ushtar do të marrë rreth 2,000 dollarë (rreth 1,800 euro) në muaj, mbi pagën mesatare vjetore në Korenë e Veriut, dhe Rusia aktualisht po rekruton përkthyes për të trajnuar këta ushtarë në operimin e dronëve dhe pajisjeve të teknologjisë së lartë, sipas Inteligjencës së Koresë së Jugut.
Për Ministrin e Mbrojtjes të Koresë së Jugut, Kim Jong-hun, ushtarët do të përdoren si “mercenarë ” nga Rusia: “Kim Jong-un thjesht ka shitur ushtarët e tij”.
Forcat speciale të Koresë së Veriut po trajnohen “për t’u vendosur thellë në territorin e armikut”, tha për AFP Lim Eul-chul, një profesor në Institutin për Studimet e Lindjes së Largët në Seul.
“Objektivi i tyre është zakonisht të depërtojnë në pjesën e pasme, të godasin objektet kritike dhe të kryejnë operacione përçarëse,” shtoi ai.
Kreu i shërbimit të inteligjencës ushtarake ukrainase, Kirill Budanov, iu referua mbërritjes së afërt të ushtarëve të parë të Koresë së Veriut në rajonin rus të Kurskut, i cili ndodhet në kufirin me Ukrainën. Kievi kontrollon disa qindra kilometra katrorë atje pas sulmit të befasishëm që nisi në fillim të gushtit.
