Ardian Ismajli do të jetë një nga emrat më të përfolur në merkaton e janarit në Serinë A. Mbrojtësi i Empolit ka bërë një sezon të shkëlqyer dhe ka tërhequr vëmendjen e klubeve më të mëdha italiane, të cilat janë gati të përfitojnë nga fakti se ai është në vitin e fundit të kontratës së tij me skuadrën aktuale.
Zgjedhja që do të bëjë mbrojtësi i Kombëtares do të ketë një rëndësi të madhe për karrierën e tij, por paralelisht po mban plotësisht në ajër klubin e Empolit. Mediat italiane raportojnë se situata e mbrojtësit shqiptar është ajo që ka bllokuar plotësisht veprimet në merkato për këtë klub.
Nëse Ismajli largohet, atëherë Empoli do të kërkojë në janar një lojtar cilësor për të plotësuar prapavijën, pasi ai është prioriteti për klube që luftojnë për mbijetesë. Nëse klubi bind futbollistin të qëndrojë të paktën deri në mbyllje të edicionit, atëherë të gjitha sforcot në merkato do të jenë për të afruar një sulmues qendre, që i mungon aktualisht.
Kësisoj, vendimi i Ismajlit po mban pezull klubin, i cili kërkon të dijë sa më shpejt se ku duhet të përqendrohet në dritaren e merkatos që hapet në ditët e ardhshme.
PANORAMASPORT.AL
