TIRANË– Kryeredaktori i Gazetës Shqiptare, Erl Murati, i ftuar në rubrikën Opinion në News 24, duke folur për protestën e 20 shkurtit të opozitës, tha se demonstrata dha shenja pozitive për bashkimin e opozitës. Murati shtoi se sidoqoftë ka shumë punë për bashkimin e spektrit opozitar.

‘Për protestën, vetë Berisha tha se do të ndodhë përmbysja e regjimit, siç tha ai, por nuk ndodhi kështu. Por ishte një protestë, ku populli demonstroi pakënaqësi. Meta, Kryemadhi dhe Idrizi munguan në Federatën e Opozitës së Bashkuar. Berisha është simpantizant i protestës, shumica e njerëzve dolën në shesh pas thirrjes së Sali Berishës. Protesta ishte një hap drejt bashkimit, por ka ende punë. Protesta kishte risi dhe gjuha e Berishës ishte disi më e lëmuar, nuk ishte e vrazhdë. Berisha apo liderët e opozitës duhet të bëjnë për vetë edhe ata njerëz, që janë të pakënaqur dhe që jo domosdoshmërisht janë me PD-në. Berisha ishte i ndërgjegjshëm që i fliste një mase më të madhe, jo vetëm besnikëve të tij. Opozita duhet të ketë emra të rinj për zgjedhjet e vitit 2025. Duhen politikanë, që fjalët e tyre përputhen me veprat’, tha Murati.

Erl Murati theksoi se ish-kryeministri Sali Berisha duhet të reflektojë për tërheqjen e tij të mundshme nga politika. Sipas Muratit, opozita e bashkuar duhet që të ketë një tjetër emër si kandidat për kryeministër dhe jo Berishën.

‘Opozita ka disa probleme. Kodi Zgjedhor nuk e favorizon një opozitë të ndarë. Përçarja nuk e favorizon opozitën. Ka nevojë për reformim të PD-së dhe të opozitës në tërësi. Asnjë kryetar i asnjë partie, qoftë dhe partitë e vogla, nuk dhanë dorëheqje, edhe pas humbjes në zgjedhje. Berisha duhet të ketë reflektim për tërheqjen e tij. Opozita duhet të jetë e vetëdijshme se duhet të shkojë në zgjedhje me emër të ri për kryeministër. Berisha është dhe në arrest shtëpie e nuk arrin të bëjë as fushatë. Pavarësisht për rolin pozitiv për shtrëngimin e radhëve që ka Berisha, unë besoj se do ishte pozitive për Federatën e Opozitës, nëse do kishte figurë politike, që bashkon opozitarët’, u shpreh Erl Murati.

Në lidhje me ligjin për amnistinë penale, Murati vlerësoi se ky ligj iu shërben partive të mëdha politike në vend dhe jo popullit shqiptar.

(BalkanWeb)

Burimi informacionit @BalkanWeb: Lexo me shume ne : Bota Sot News botasot.co