Është cilësuar si skandali më i madh i spiunazhit në Austri prej dekadash, i cili filloi me arrestimin e një ish-zyrtari të sigurisë vendase dhe ka çuar në një sërë akuzash dhe kundërakuzash.

Egisto Ott, 61 vjeç, u arrestua në fund të marsit me dyshimin për spiunazh për Rusinë. Sipas një urdhër-arresti të policisë austriake prej 86 faqesh, të marrë nga mediat austriake dhe gjermane, Ott dyshohet se i ka kaluar informacion Jan Marsalek, ekzekutivit të arratisur të firmës gjermane të pagesave Wirecard. Marsalek, 44 vjeç dhe gjithashtu shtetas austriak, kërkohet nga policia gjermane për mashtrim të dyshuar dhe aktualisht besohet të jetë në Moskë, pasi ka ikur përmes Austrisë në vitin 2020. Një raport i fundit nga një grup gazetash evropiane tha se ai ishte rekrutuar nga agjentë rusë në 2014.

Urdhri i policisë austriake thuhet se pretendon se ish-shefi i Wirecard-it ka porositur Egisto Ott dhe një oficer tjetër austriak të sigurisë që t’i transmetojnë informacione të ndjeshme Rusisë për disa vite, nga viti 2017. Ott mohon çdo keqbërje dhe ai aktualisht është në paraburgim. Ai u pezullua në vitin 2017 dhe më pas u ndalua katër vjet më vonë përpara se të lirohej. Ai u arrestua në fund të muajit të kaluar pasi u dhanë prova të reja nga inteligjenca britanike. Ai dyshohet se, sipas raporteve, i ka kaluar Rusisë të dhëna telefonike nga zyrtarë të lartë të ministrisë së brendshme austriake. Gazeta austriake Standard thotë se Egisto Ott me sa duket i ka marrë telefonat pasi ata ranë aksidentalisht në Danub gjatë një udhëtimi me varkë të ministrisë së brendshme.

Ai dyshohet se ka kopjuar përmbajtjen e tyre dhe ia ka transmetuar Jan Marsalek-ut dhe Moskës. Ai gjithashtu dyshohet se ka marrë me pretendime të rreme adresën në Vjenë të gazetarit bullgar Kristo Grozev. Grozev është i njohur për hetimet mbi aktivitetet e inteligjencës ruse, si helmimi i politikanit opozitar Alexei Navalny në vitin 2022, i cili vdiq në një burg rus në Rrethin Arktik këtë vit. Kristo Grozev që atëherë është larguar nga Vjena.

Ai i tha gazetës Falter se këtë e ka bërë për arsye sigurie. Kancelari i Austrisë, Karl Nehammer, e ka përshkruar rastin Egisto Ott si “një kërcënim për demokracinë dhe sigurinë kombëtare të vendit”. Ai ka bërë thirrje për një hetim të shpejtë për këtë çështje. Skandali i spiunazhit ka ringjallur frikën se Austria mbetet një vatër e aktivitetit të spiunazhit rus. Partia e Gjelbër e Austrisë, partia e vogël në koalicionin qeverisës, e ka quajtur Egisto Ott “maja e ajsbergut rus” në Austri. Të Gjelbrit kanë akuzuar Partinë e Lirisë së ekstremit të djathtë se ka mundësuar spiunazhin rus, se ka vepruar si “një zgjatim i krahut të Rusisë” në Austri. Partia e Lirisë (FPÖ) është tani në opozitë, por udhëheqësi Herbert Kickl ishte ministër i brendshëm nga 2017 deri në 2019.

Burimi informacionit @BalkanWeb: Lexo me shume ne : Bota Sot News botasot.co