Një ndihmës i ngushtë i kryeministrit izraelit Benjamin Netanyahu, dyshohet se ka nxjerrë dokumente sekrete sigurie, si pjesë e një fushate të orkestruar për të shuar një marrëveshje pengjesh, zbuluan dokumentet e gjykatës.
Spekulimet rreth çështjes kishin tërhequr vëmendjen e publikut për ditë të tëra, edhe para se gjyqtari të nxirrte pjesërisht një urdhër shkelje të sigurisë.
Kjo situatë sipas Jerusalem Post është përshkruar si një nga shkeljet më të rënda të sigurisë në historinë e vendit. Detajet janë të pakta, por vendimi i gjykatës tregoi se katër persona ishin nën hetim, duke përfshirë Eliezer Feldstein, një bashkëpunëtor i ngushtë i Netanyahut që punonte jozyrtarisht për të.
“Hetimi filloi pasi u ngritën dyshime të rëndësishme në Shin Bet dhe IDF, gjithashtu në dritën e raporteve të mediave që tregonin se informacioni i fshehtë dhe i ndjeshëm i inteligjencës u mor nga sistemet e IDF dhe u nxor në mënyrë të paligjshme,” theksoi gjyqtari. “Kjo ngriti shqetësime për dëmtim serioz ndaj sigurisë kombëtare dhe rrezik për burimet e inteligjencës. Si rezultat, mund të ketë dëmtime në aftësinë e forcave të sigurisë për të arritur objektivin e lirimit të pengjeve si pjesë e objektivave të luftës”, shtoi ai.
Pas kësaj, filloi një hetim i përbashkët sekret nga Shin Bet, IDF dhe Policia e Izraelit, gjatë të cilit këto dyshime u forcuan ndjeshëm.
“Për këtë arsye, ka nisur një hetim i hapur, gjatë të cilit deri më tani janë hetuar katër persona të dyshuar të përfshirë në këtë aktivitet, disa prej tyre zyrtarë të sistemit të sigurisë dhe një shtetas i quajtur Eliezer Feldstein. Hetimi është në vijim dhe po zhvillohet në përputhje me ligjin dhe nën mbikëqyrjen gjyqësore. Çdo publikim shtesë në lidhje me hetimin mund të çojë në dëmtim të hetimit, objektivave të tij dhe sigurisë kombëtare”, vuri në dukje gjyqtari.
Kush është Eliezer Feldstein
Feldstein u punësua nga ekipi i zyrës së shtypit të kryeministrit izraelit menjëherë pas fillimit të luftës, megjithëse statusi i tij i saktë i punësimit mbeti i paqartë. Ai ka shërbyer më parë si zëdhënës i IDF-së dhe më pas si zëdhënës i Ministrit të Sigurisë Kombëtare Itamar Ben-Gvir.
Sipas Jerusalem Post, Feldstein nuk kaloi në procesin e kontrollit të sigurisë së Shin Bet dhe për këtë arsye shërbeu si këshilltar dhe nuk ishte zyrtarisht punonjës i zyrës së kryeministrit. Zyra e kryeministrit pohoi se asnjë anëtar nuk ishte arrestuar apo marrë në pyetje.
Megjithatë, Feldstein, edhe pse zyrtarisht nuk është anëtar i zyrës, shihet në fotografitë që shoqërojnë kryeministrin izraelit në disa turne nëpër baza ushtarake dhe është i pranishëm në një sërë diskutimesh me zyrtarë të lartë të sigurisë.
Udhëheqësi i opozitës Yair Lapid tha në një konferencë shtypi të dielën mbrëma së bashku me kreun e Partisë së Unitetit Kombëtar të Benny Gantz, se Netanyahu ishte ose bashkëpunëtor në rrjedhjen e informacionit të klasifikuar në një përpjekje për të prishur marrëveshjen e pengjeve ose është plotësisht i paaftë për të udhëhequr vendin.
