Pak ditë më parë kryeministri britanik, Kier Starmer shprehu interes për marrëveshjen e migracionit Itali-Shqipëri, gjatë një takimi që pati në Romë me homologen italiane, Giorgia Meloni. Starmer tha se ishte i interesuar për strategjinë e Italisë për të ndaluar emigrantët të arrijnë në vend. Dhe menjëherë pas kësaj deklarate perceptimi që u krijua ishte se Shqipëria do të strehonte në një të ardhme edhe refugjatët e vendeve të treta të cilët mbërrijnë ilegalisht në brigjet britanike.

Përgjigjja e kryeministrit Edi Rama nuk ka vonuar. Kreu i qeverisë shqiptare ka thënë në një intervistë për Euronews se me Londrën nuk mund të ketë një marrëveshje të ngjashme si me Romën. Përgjigjja e Ramës për çdo shtet që synon një qasje pragmatiste sa i takon problematikës së refugjatëve dhe sheh Shqipërinë si zgjidhje, është mohuese. Sipas tij, marrëveshja me Italinë është një përjashtim pasi ka privilegje ekskluzive në Shqipëri dhe se çdo qeveri tjetër nuk mund të presë të arrijë të njëjtën marrëveshje.

“Qeveritë që kërkojnë të përsërisin marrëveshjen e arritur midis Italisë dhe Shqipërisë për të kontraktuar përpunimin e kërkesave për azil, nuk duhet të shikojnë nga Shqipëria për një partner”, është shprehur Rama.

Sikurse ka deklaruar prej afro 1 viti tanimë pas firmosjes së marrëveshjes me Melonin, Rama përsërit se ky nuk është kthimi i një borxhi për Italinë, e cila po mbështet pa kushte integrimin e Shqipërisë.

“Ne vendosëm ta bëjmë këtë bazuar në ndjenjën e përgjegjësisë si fqinjë, si evropianë. Sigurisht që është më mirë sesa thjesht të luftosh ideologjikisht për këtë çështje dhe të mos bësh asgjë”.

Sipas marrëveshjes pesëvjeçare të arritur mes Tiranës dhe Romës nëntorin e kaluar, emigrantët e kapur në det nga autoritetet italiane do të transferohen në qendrat e pritjes pranë portit shqiptar të Shëngjinit, ku kërkesat e tyre për mbrojtje ndërkombëtare do të përpunohen me shpejtësi nga personeli italian dhe më pas do të vendosen në qendrën e azilkërkuese të Gjadrit me një kapacitet deri 3 mijë persona.

(BalkanWeb)

Burimi informacionit @BalkanWeb: Lexo me shume ne : Bota Sot News botasot.co