KINË – Pesëmbëdhjetë persona kanë humbur jetën dhe më shumë se 40 të tjerë janë plagosur, pasi një zjarr shpërtheu në një ndërtesë apartamentesh në Kinën lindore, thanë autoritetet lokale.

Pamjet e shpërndara në mediet sociale treguan flakë dhe shtëllunga tymi të zi, që përfshinin disa kate të një rrokaqielli në qytetin Nanjing. Zyrtarët sugjeruan se zjarri filloi në katin e parë të ndërtesës, ku po mbaheshin biçikletat elektrike.

Por shkaku konkret i zjarrit ende është nën hetim. Ndërtesa ndodhet në rrethin Yuhuatai të Nanjing, një qytet me më shumë se tetë milionë banorë, që shtrihet rreth 162 milje (260 km) në veri-perëndim të Shangait. Ekuipazhet e shërbimit të urgjencës u njoftuan fillimisht për zjarrin në orën 04:40 me orën lokale të premten, thanë zyrtarët të shtunën në mëngjes.

Njëzet e pesë makina zjarrfikëse dhe 130 zjarrfikës u dërguan për të shuar flakët. Deri në orën 06:00, zjarri ishte shuar, ndërsa operacioni i kërkim-shpëtimit përfundoi rreth orës 14:00. Nga 44 personat e lënduar të dërguar në spital për trajtim, njëri është në gjendje kritike dhe një tjetër i plagosur rëndë, thanë zyrtarët.

Në një konferencë për shtyp, kryebashkiaku i Nanjing, Chen Zhichang u shprehu ngushëllime dhe kërkoi falje për familjet e viktimave. Fotot ajrore të rrokaqiellit të shpërndara të premten pas shuarjes së zjarrit treguan disa banesa në gjatësinë e ndërtesës me ballina të nxira.

(BalkanWeb)

Burimi informacionit @BalkanWeb: Lexo me shume ne : Bota Sot News botasot.co