Familja më e pasur në Mbretërinë e Bashkuar i paguante shërbëtorët më pak se ushqimi i qenve, dënohen nga Gjykata

Hindujat kanë një pasuri të vlerësuar prej 37 miliardë paund, por paga e punonjësve të tyre ishte tetë euro për 18 orë punë në ditë. Një gjykatë e Gjenevës i dha një dënim me katër vjet burg.

Ata janë familja më e pasur në Mbretërinë e Bashkuar, por sigurisht jo më bujarja. Katër anëtarë të Hinduja, një familje me origjinë indiane, u dënuan për shfrytëzimin e punonjësve të tyre deri në atë pikë sa i paguanin më pak në ditë sesa shpenzojnë për të ushqyer qentë e tyre.

Prakash dhe Kamal Hinduja, djali i tyre Ajay dhe nusja Namrata, u dënuan për shfrytëzimin e shërbëtorëve shtëpiakë, të sjellë nga India për të punuar në vilën e tyre në Gjenevë.

Siç raporton BBC, akuzat për shfrytëzim dhe punë të paligjshme u njohën nga një gjykatë zvicerane e cila dha dënime nga 4 deri në 4.6 vjet, ndërsa të katër u liruan nga akuza më e rëndë e trafikimit të qenieve njerëzore. Avokatët që përfaqësojnë të pandehurit thanë se synojnë të apelojnë dënimin. Tre punëtorë të sjellë nga vendlindja e tyre India raportuan se familja i paguante vetëm shtatë paund (pak më shumë se tetë euro) për të punuar 18 orë në ditë. Kjo është më pak se një e dhjeta e shumës minimale të kërkuar nga ligji zviceran. Për t’i mbajtur ata nën kontroll, familja kishte sekuestruar edhe pasaportat e punonjësve të tyre.

Prokurorët thanë gjithashtu se familja, pasuria e së cilës vlerësohet në rreth 37 miliardë paund, rrallë i lejoi ata të largoheshin nga shtëpia e tyre, e cila është në lagjen e pasur të Gjenevës.

Mbrojtja argumentoi se punonjësit merrnin përfitime të mëdha, se ata nuk mbaheshin në izolim dhe se ata ishin të lirë të largoheshin nga vila dhe ishin në të vërtetë “mirënjohës ndaj Hindujas që u ofruan atyre një jetë më të mirë”. Prakash dhe Kamal Hinduja, të dy në të shtatëdhjetat, nuk morën pjesë në procedurat gjyqësore për arsye shëndetësore. Ajay dhe Namrata ishin të pranishëm në gjykatë, por jo në leximin e vendimit.

Prokuroria kërkoi menjëherë masën e ndalimit për çiftin e ri, por një gjë e tillë u refuzua nga gjyqtari. Mbrojtja tha se Kamal Hinduja është aktualisht i shtruar në spital në Mynih – dhe tre anëtarë të tjerë të familjes janë pranë shtratit të tij. Familja Hinduja zotëron grupin Hinduja, një shumëkombëshe me interesa në naftë, gaz dhe banka, dhe zotëron hotelin Raffles në Londër.

Burimi informacionit @BalkanWeb: Lexo me shume ne : Bota Sot News botasot.co