Kryeministri Benjamin Netanyahu dhe familja e tij planifikojnë të hyjnë në kompleksin e bunkerit nëntokësor në Jerusalem, i projektuar për zyrtarët e lartë në rast të një sulmi iranian ndaj Izraelit. Ky informacion vjen nga burime pranë Netanyahut.

Kohët e fundit, Agjencia e Sigurisë së Izraelit (Shin Bet) ka përgatitur bunkerin e komandës nëntokësore, Qendrën Kombëtare të Menaxhimit të Krizave (NCM), e vendosur thellë nën tokë në zonën e Jerusalemit. Këtu pritet që kryeministri dhe qeveria të menaxhojnë vendin në rast emergjence.

Burimet tregojnë se Netanyahu, gruaja e tij Sara dhe djali i tyre Yair, i cili tani ndodhet në Izrael, po mendojnë ta kalojnë natën në bunker nëse ndodh një sulm iranian. Mirëpo, Kryeministria i ka mohuar këto pretendime duke i cilësuar si “fake news”.

Familja Netanyahu thuhet se ka frikë nga kërcënimet e qarta iraniane, si deklarata e një deputeti iranian se “ne nuk do të kënaqemi me më pak se koka e Netanyahut”. Ehud Yaari i News Channel 12 raportoi se një gazetë e lidhur me liderin suprem të Iranit deklaroi se përgjigja iraniane do të synonte “rezidencat e kryekriminelëve”.

Bunkeri është një strukturë sekrete, e ndjeshme në zonën e Jerusalemit, e ndërtuar me një kosto prej miliarda dollarësh pas rekomandimeve të Komisionit të Winogradit pas Luftës së Dytë të Libanit. Është menduar për zyrtarë të lartë ushtarakë dhe qeveritarë gjatë emergjencave. Ky kompleks bunkeri bërthamor nëntokësor është shumë i mbrojtur dhe mundëson komunikim të koduar dhe siguri të nivelit të lartë.

Gjatë sulmit të mëparshëm të Iranit ndaj Izraelit në prill, Netanyahu dhe gruaja e tij u zhvendosën në shtëpinë e familjes së miliarderit Simon Falic në Jerusalem, e cila thuhet se ka një strehë të avancuar kundër raketave.

Në mënyrë të ngjashme, në javët e para të luftës së 7 tetorit, familja Netanyahu ndërronte shtëpinë e Falic dhe rezidencën e tyre private në Cezare, e cila aktualisht është në rinovim. Yair Netanyahu, i cili kishte qenë në Majami për pjesën më të madhe të luftës, së fundmi u kthye në Izrael me prindërit e tij në aeroplanin “Wings of Sion”, sipas gazetarit Uri Mashgav.

(A.A/BalkanWeb)

Burimi informacionit @BalkanWeb: Lexo me shume ne : Bota Sot News botasot.co