Kanë mbetur edhe pesë javë nga përfundimi i sezonit të rregullt në kampionatin “Abissnet Superiore” ku të gjitha skuadrat po luftojnë për objektivat sezonal. Megjithatë spektakli i vërtetë i këtij edicioni do të nisë pas përfundimit të javës së 36-të.

Ndryshe nga sezonet e kaluara, këtë edicion në kampionatin “Abissnet Superiore” do të aplikohet një formulë e re, “Final Four”. Pas përfundimit të 36-të javëve, katër skuadrat më të mira të sezonit do të përballen me njëra-tjetrën për të shpallur ekipin kampion të këtij sezoni. Çdo gjë do të nisë me hedhjen e shortit që do të organizohet nga FSHF, menjëherë sapo të përfundojë java e 36-të e kampionatit. Skuadrat do të ndahen në dy vazo, ku në vazon 1 do të vendosen (vendi i parë dhe i dytë), ndërsa në vazon 2 (vendi i tretë dhe i katërt) dhe përmes shortit përcaktohen çiftet gjysmëfinaliste.

Në finale kalojnë ekipet fituese dhe ajo që duhet saktësuar është që skema “Final 4” favorizon skuadrat e renditura më mirë në klasifikim në dy ndeshjet gjysmëfinale, pasi vendi i parë dhe i dytë mund të sigurojë finalen edhe falë barazimit. Më pas do të luhet gjithçka në finalen e madhe për titullin kampion mes dy skuadrave që do të kualifikohen më tej, ndërsa ekipet që do të eliminohen nga faza gjysmëfinale do të luftojnë për vendin e tretë.

Skema e re e kampionatit ka nxitur akoma edhe më shumë konkurencën dhe të gjitha skuadrat po luftojnë për objektivat e tyre. Jemi pesë javë nga fundi i kampionatit të rregullt dhe ende nuk është vendosur asgjë edhe për “Final Four”, por edhe për objektivin mbijetesë. Kjo skemë ka si synim për të afruar më shumë spektatorë në shkallët e stadiumit, për të promovuar sa më shumë kampionatin shqiptar dhe për t’u dhuruar tifozëve ndeshje me më shumë nivel në fundin e kampionatit. Gjithashtu, një nga synimet kryesore është që klubet të përfitojnë më shumë të ardhura në përfundim të sezonit. FSHF ka përcaktuar shpërblimet për të gjitha skuadrat. Pas përfundimit të 36-të javëve ekipet e renditura nga vendi i parë në të katërt do të përfitojnë bonuset financiare të përcaktuara, ndërsa në “Final Four” ekipi kampion merr një tjetër shpërblim nga FSHF. Pra më shumë të ardhura për klubet dhe sfida që kanë të garantuar spektaklin.

Të gjitha takimet e “Final Four” do të luhen në stadiumin “Air Albania” një nga impiantet më moderne që plotëson të gjitha kushtet, prandaj këto ndeshje nuk janë vetëm për tifozët e klubeve që do të përballen në “Final Four” por për të gjithë futbolldashësit e kampionatit shqiptar që duan të ndjekin nga afër spektaklin.

FSHF ka nisur nga puna për të organizuar sa më mirë “Final Four” dhe siç është bërë e ditur ka nisur edhe shitja e biletave, ku është menduar që për të gjithë futbolldashësit të ofrohen edhe bileta me një çmim promocion për të gjitha takimet, për të përjetuar nga afër emcionet e “Final Four”.

Biletat për ndeshjet e “Final Four” mund të blihen online në  ebileta.al  por edhe në pikat fizike pranë stadiumit “Air Albania” dhe stadiumit “Selman Stermasi” në fashën orare 10:00-18:00. Biletat me çmim promocional do të shiten vetëm në dy pikat fizike.

Burimi informacionit @BalkanWeb: Lexo me shume ne : Bota Sot News botasot.co