![Fitoi bindshëm bashkinë e Himarës, Tavo përsërit thirrjen e bashkëpunimit për Gjikurinë: I dashur Petro, qëndro në krahun tim si nënkryetar 2 fitoi bindshem bashkine e himares tavo perserit thirrjen e bashkepunimit per gjikurine i dashur petro qendro ne krahun tim si nenkryetar](https://botasot.co/wp-content/uploads/2024/08/fitoi-bindshem-bashkine-e-himares-tavo-perserit-thirrjen-e-bashkepunimit-per-gjikurine-i-dashur-petro-qendro-ne-krahun-tim-si-nenkryetar.jpg)
Kryebashkiaku i ri i Himarës, Vangjel Tavo ka reaguar në rrjetet sociale pasi ditën e sotme u shpall zyrtarisht fitues përballë Petro Gjikurisë.
Tavo i është drejtuar këtij të fundit duke shprehur vlerësim për telefonatën e tij të urimit pas shpalljes së rezultatit, ndërsa përsëriti thirrjen e tij për kandidatin e opozitës për t’iu bashkuar programit të tij për drejtimin e Himarës në pozitën e zv/kryetarit.
Ai shtoi se pritshmëria e tij për një “po” nga Gjikuria zgjati vetëm pak, ndërsa shprehu keqardhje për reagimin e kandidatit të opozitës dhe rikujtoi se në këto zgjedhje pati më shumë votoues se në procesin e vitit të kaluar.
Pavarësisht kësaj, Tavo përsëriti edhe një herë thirrjen ndaj Gjikurisë për të qëndruar në krah të tij.
Reagimi i plotë:
I dashur Petro,
Sot Himara kishte një arsye të madhe për t’u gëzuar sepse ishte ajo fituesja e 4 gushtit, sikurse edhe unë e kisha dhe e kam zemrën plot nga mesazhet e pafundta të urimeve nga shumë e shumë banorë të Himarës, e mbështetës brenda e jashtë vendit.
Por, një shkëndijë më shumë e këtij gëzimi ishte edhe telefonata juaj e urimit e para pak orëve. E vlerësova shumë dhe e pranova sinqerisht si një akt qytetarie dhe si sjellje e një njeriu me mendësi të hapur perëndimore, por, pa e mohuar, e prita edhe me shpresën se po më telefonoje për të pranuar ftesën time publike për t’iu bashkuar programit tonë të drejtimit të Bashkisë Himarë në pozicionin e zëvendëskryetarit.
Por, pritshmëria ime e lartë ndaj teje zgjati vetëm pak e tani jam i keqardhur për reagimin tënd, a thua se Himara është një fushë betejash ku përballen ushtri armike dhe jo alternativa politike dhe qytetare, si në të gjithë Shqipërinë demokratike.
Të kujtoj i dashur, se këtë herë në Himarë pati më shumë votues se sa vjet, kur qeveria e kishte shtyrë afatin e skadimit të kartave të identitetit. Dhe rezultati është ky që është, produkt i vullnetit të lirë të qytetarëve, ndërkohë që nuk pati se as nuk kishte si të kishte mijëra zgjedhës të cilëve iu mohua e drejta, pasi koha e votimeve 99.99% ka ikur me diktaturën.
Po, e vërtetë! Pati disa dhjetra qytetarë, votues të tutë dhe të mitë, që nuk mundën të votonin për shkak të dokumentave të skaduar të idenditetit, për të cilët kush e dëgjoi thirrjen e ministrisë së brendshme dhe e rinovoi mundi edhe të votonte normalisht.
Prandaj i dashur Petro, unë të përsëris ftesën time që të mos largohesh andej nga erdhe, po të qëndrosh bashkë me mua në krahun tim, në pozicionin e nënkryetarit të bashkisë.
Do të isha shumë i nderuar nëse do ta pranoje propozimin tim, ndërsa në rast të kundërt të uroj megjithë zemër rrugë të mbarë për Amerikë dhe suksese atje. Por në të gjitha rastet le të mbetemi në kontakt dhe për Himarën mos u shqetëso, sepse është në duart të sigurta dhe ka mbështetjen e padiskutueshme të Edi Ramës dhe Partisë Socialiste.
Sinqerisht
Vangjel Tavo
Grupi Balkanweb
Burimi informacionit @BalkanWeb: Lexo me shume ne : Bota Sot News botasot.co