Anëtarët e G7 shprehën “dënimin e tyre të vendosur” për sulmin iranian të së martës ndaj Izraelit, duke shprehur shqetësim të fortë për përshkallëzimin në Lindjen e Mesme.

Si presidente e Këshillit të Ministrave, kryeministrja italiane Giorgia Meloni thirri dhe kryesoi një video-konferencë urgjente të liderëve të G7, “pas përkeqësimit të krizës në Lindjen e Mesme”.

“Gjatë bisedës, liderët përsëritën dënimin e vendosur të sulmit të Iranit kundër Izraelit,” tha një deklaratë e lëshuar nga Presidenca italiane e G7 .

Të martën mbrëma, Irani kreu një sulm të madh raketor mbi Izraelin si hakmarrje për vrasjen e liderit të Hamasit Ismail Haniyeh, shefit të Hezbollahut, Hassan Nasrallah dhe një komandanti të Gardës Revolucionare iraniane.

Duke vënë në dukje “një skenar që ndryshon vazhdimisht”, udhëheqësit ranë dakord të punojnë së bashku për të nxitur një ulje të tensioneve në nivel rajonal, duke filluar me zbatimin e rezolutës 2735 të Këshillit të Sigurimit të OKB-së për Gazën dhe rezolutës 1701.

“Duke shprehur shqetësimin e tyre të fortë për përshkallëzimin e orëve të fundit, u riafirmua se një konflikt në mbarë rajonin nuk është në interesin e askujt dhe se një zgjidhje diplomatike është ende e mundur”, thuhet në deklaratë.

Tensionet rajonale janë përshkallëzuar për shkak të ofensivës brutale të Izraelit në Rripin e Gazës, e cila ka vrarë rreth 41,700 njerëz, kryesisht gra dhe fëmijë, pas një sulmi të Hamasit tetorin e kaluar.

Konflikti u përhap në Liban me Izraelin duke nisur sulme vdekjeprurëse në të gjithë vendin, të cilat kanë vrarë 1,928 njerëz dhe plagosur afro 9,300 të tjerë që nga 23 shtatori.

(A.A/BalkanWeb)

Burimi informacionit @BalkanWeb: Lexo me shume ne : Bota Sot News botasot.co