Të paktën pesë persona janë vrarë në një sulm ajror në qytetin rus të Belgorod, ndërkohë që tetëmbëdhjetë të tjerë thuhet se janë plagosur në sulmin jo shumë larg kufirit ukrainas.

Videot që qarkullojnë në mediat sociale tregojnë disa ambulanca të parkuara jashtë një qendre tregtare të dëmtuar rëndë me xhama të thyer.

Zyrtarët rusë thanë se sistemet e mbrojtjes ajrore kishin rrëzuar 14 raketa ukrainase mbi rajonin e Belgorodit.

Televizioni rus Zvezda, i cili është i lidhur ngushtë me ministrinë e mbrojtjes, tha se një raketë goditi një qendër tregtare dhe një ra në stadiumin sportiv të qytetit.

Belgorod shtrihet rreth 30 km larg kufirit me Ukrainën.

Ajo ka qenë shpesh në shënjestër nga forcat ukrainase që nga fillimi i pushtimit të plotë të Rusisë në Ukrainë gati dy vjet më parë.

Një sulm me dron dhe raketë në dhjetor vrau 25 persona dhe plagosi 100 të tjerë në sulmin më vdekjeprurës në Belgorod deri më tani.

Natën e kaluar, Rusia gjuajti 26 raketa në Ukrainë, duke vrarë një grua 66-vjeçare në Chuguyiv, afër Kharkiv në lindje, dhe duke plagosur disa të tjerë.

Ndërkohë, beteja për qytetin lindor të Ukrainës Avdiivka vazhdon.

Disa ushtarë ukrainas i kanë thënë BBC-së se qyteti mund të bjerë në çdo moment, duke shpjeguar se ka mungesa të rënda të armëve dhe municioneve.

Sekretari i Përgjithshëm i NATO-s, Jen Stoltenberg paralajmëroi të enjten se dështimi i SHBA-së për të miratuar ndihmën e vazhdueshme ushtarake për Ukrainën tashmë ka një ndikim në fushën e betejës.

Avdiivka është një vend kyç sepse është një portë për në qytetin e Donetskut të kontrolluar nga Rusia. Ajo ka qenë në vijën e frontit që nga viti 2014 kur filloi konflikti në Ukrainën lindore.

Burimi informacionit @BalkanWeb: Lexo me shume ne : Bota Sot News botasot.co