Ministrja e Turizmit dhe Mjedisit, Mirela Kumbaro, ka folur edhe në lidhje me deklaratën e kryeministrit Edi Rama, se lejet për shezllone nuk do të jepen më për beach bar-et apo restorantet, por vetëm për hotelet.

Kumbaro u shpreh se shezllonet nuk duhet të shihen si një biznes i mirëfilltë apo mënyrë për të fituar para sezonale, sepse ky nuk është një investim i qendrueshëm.

Ministrja shtoi se shezllonët i takon t’i mbajnë ata që kanë bërë investime miliona euroshe.

“Janë 11 bashki bregdetare e të cilët jemi në komunikim intensive. Kemi nxjerrë edhe konkluzionet tona. Bashkitë bregdetare përcaktojnë ndarjen e bregdetit të tyre në parcela të cilat mund të jepen si stacione plazhi në menaxhim. Ajo që konstatuam në 2 vitet e fundit e ka shoqëruar numrin e madh në rritje të turizmit, është zelli për të mbushur plazhet, pavarësisht se VKM thotë 30 përqind e vijës bregdetare duhet të jetë publike, dhe në realitet 50 përqind e vijës ishte publike.

Këtu kemi pasur një keqkuptim të madh nga bizneset të cilët menduan se fluksi i turistëve do të vijë i gjithi të rrijë në plazh. Nuk vijnë të gjithë të rrinë 2 javë në plazh, vijnë edhe për malin apo turizëm kulturor. Mendoj që ka qenë e gabuar nga sektori privat kjo rendje pas shezlloneve si biznes i mirëfilltë. Shezllonet nuk mund të jenë biznesi i parë. Biznesi i parë në turizëm janë shërbimet e qëndrueshëm, pra hoteli me restorante me bare e shesh lodrash.

Një prej elementeve janë shezllonet. Ajo që do të bëjmë është që po përgatisim e del brenda shtatori VKM me rregulloren e re, siç e bëri të ditur edhe kryeministri, që do t’ua vëmë në dispozicion atyre që kanë biznes të qendrueshëm në turizëm. Dikush që ka shpenzuar miliona për një hotel me 60 dhoma e me standard të lartë duhet të ketë edhe plazhin. Dikush që merr një stacion plazhi që të bëjë ca leke, ky nuk është investim i qendrueshëm“, u shpreh ajo, në “Kjo Javë”.

(BalkanWeb)

Burimi informacionit @BalkanWeb: Lexo me shume ne : Bota Sot News botasot.co