Deputeti i Partisë Demokratike, Edi Paloka, ka komentuar arrestimin e ish-ministrit të Shëndetësisë Ilir Beqaj, për vjedhjen e fondeve të Bashkimit Evropian, ku tha se ai është akuzuar nga opozita për afera edhe më të rënda.
“Ilir Beqaj që ka disa padi, për miliona euro që na vidhen neve, është arrestuar për disa mijëra euro që i ka vjedhur BE-së. Imagjinoni çfarë monstrash janë këta. Duke qenë në situatë të sikletshme, sërish vjedh”, tha Paloka.
I ftuar në emisionin Kjo javë në News 24, deputeti u shpreh se sipas tij, drejtësia në vend bëhet ashtu siç do kryeministri Rama.
“Drejtësia e Ramës është si koha e Enver Hoxhës. Këtu ka marrëveshje, iu thotë Rama që shkoni bëni nja 6 muaj burg me akuza të lehta, se këta kanë vjedhur me Edi Ramën. Edhe Arben Ahmetaj nuk ka folur shumë, që nuk pranoi të bashkëpunojë me Ramën.
SPAK metaforikisht po vepron kështu, që dikush ka bërë vrasje prsh, e merr se ka kaluar vijat e bardha me semafor të kuq, për akuza qesharake pra. SPAK është i kapur. Edhe te rasti i Olta Xhaçkës, ligji për ta është se çfarë vendos Edi Rama. Nëse Rama thotë se në Shqipëri do ketë diell, do ketë diell, nëse thotë se do ketë shi, do ketë shi. Edhe parlamenti vepron siç thotë Rama, njësoj është dhe rasti i Xhaçkës”, tha deputeti i PD.
Më tej Paloka u ndal dhe te situata e opozitës në vend, teksa thekson se meriton disa merita për bashkimin e PD.
Paloka u shpreh se PD ka qenë një objektiv për tu shkatërruar totalisht si parti dhe pretendon se Rama është ai që ka sajuar të gjitha këto.
Demokrati tha se Berishës iu dha informacion i gabuar dhe ai i shpjegoi situatën që të mos të hiqnin dorë nga PD, sepse deputetët mblodhën firma dhe ishin gati të formonin një grup të ri.
Teksa kërkon meritat sipas të cilit i takojnë, Paloka thotë se herë pas here ai duhet të kujtojë përpjekjet që ka bërë për PD, sepse të tjerët i harrojnë.
“Thotë dikush ca betejash paskeni bërë ju, ju keni marrë vulën por ju i keni pasur ato? Por unë them që qëllimi ka qenë që PD të shkrihej dhe kjo ka qenë shumë afër, por ne kemi bërë shumë përpjekje.
Ka pasur një periudhë që ja mbushën mendjen edhe Berishës, por i kishin dhënë një informacion të gabuar dhe isha unë ai që e kundërshtova e ja shpjegova dhe ai më dëgjoi. Prandaj them që i dua ca merita, sepse i meritoj dhe duhet ti kujtoj sepse i harrojnë.
Deputetët deshën të heqin dorë nga PD dhe donin që të krijonim një grup tjetër, por unë dhe Berisha këmbëngulëm dhe jemi sot këtu ku jemi. Rama për pak e arriti qëllimin e tij për të shuar fare PD”, tha Paloka.
NDIQE LIVE “PANORAMA TV” © Panorama.al Burimi informacionit @Panorama.al: Lexo me shume ne :bota sot www.botasot.co
