Kryeministri izraelit Benjamin Netanyahu shkarkoi të martën Ministrin e tij të Mbrojtjes, Yoav Gallant për shkak të, siç tha ai, “dallimeve të shumta ndërmjet tyre” rreth menaxhimit të operacioneve ushtarake të Izraelit.
Vendimi erdhi pas mospajtimeve të vazhdueshme ndërmjet dy zyrtarëve izraelitë që nga fillimi i luftës në Gazë.
Kryeministri Netanyahu tha se, mes tij dhe ministrit Gallant ekzistonte një “krizë besimi” që pengonte menaxhimin e duhur të luftës, sipas një njoftim të publikuar nga zyra e tij.
Ministri Gallant reagoi në platformën X duke thënë se “siguria e Izraelit ishte dhe do të jetë gjithmonë misioni i jetës sime.”
Kryeministri Netanyahu emëroi Ministrin e Jashtëm të Izraelit, Israel Katz për të zëvendësuar ministrin Gallant në pozitën e ministrit të mbrojtjes, ndërkohë që emëroi zotin Gideon Saar si ministrin e ri të jashtëm, sipas njoftimit nga zyra e tij.
Një përpjekje e mëhershme në mars të vitit 2023 për ta shkarkuar ministrin Gallant nxiti protesta të gjera.
Nderkohe, Katz, u zotua sot se do t’i japë përparësi kthimit të pengjeve izraelite nga Gaza dhe shkatërrimit të Hamasit dhe Hezbollahut.
“Ne do të punojmë së bashku për të udhëhequr sistemin e sigurisë drejt fitores kundër armiqve tanë dhe për të arritur qëllimet e luftës, kthimin e të gjithë të rrëmbyerve si misioni më i rëndësishëm, shkatërrimi i Hamasit në Gaza, disfata e Hezbollahut në Liban, frenimi i agresionit iranian dhe kthimi i sigurt i njerëzve të veriut dhe jugut në shtëpitë e tyre”, tha ai.
