![Lufta/ Irani zotohet të hakmerret për vrasjen e udhëheqësit të Hamasit, Isamil Haniyeh 2 lufta irani zotohet te hakmerret per vrasjen e udheheqesit te hamasit isamil haniyeh](https://botasot.co/wp-content/uploads/2024/08/lufta-irani-zotohet-te-hakmerret-per-vrasjen-e-udheheqesit-te-hamasit-isamil-haniyeh.jpg)
Izraeli po përgatitet për hakmarrje nga Irani pasi udhëheqësi i grupit militant palestinez Hamas, Ismail Haniyeh u vra në kryeqytetin iranian. Irani fajësoi menjëherë Izraelin, i cili ende nuk ka bërë ndonjë koment për këtë. Megjithatë, siç njofton korrespondentja e Zërit të Amerikës Linda Gradstein, Izraeli ka thënë më parë se do të vrasë çdo anëtar të Hamasit të përfshirë në sulmin terrorist të 7 tetorit.
Izraeli ka rritur sigurinë në ambasadat e tij në mbarë botën dhe ka paralajmëruar qytetarët e tij që të jenë në gatishmëri pas vrasjes në Iran të udhëheqësit politik të Hamasit Ismail Haniyeh, me gjasë nga Izraeli.
Analistët izraelitë thonë se operacionet kundër një komandanti të lartë të Hezbollahut në Bejrut dhe Ismail Haniyeh-es në Teheran ishin fitore për Izraelin. Megjithatë, këto veprime, sipas tyre, do të nxisin hakmarrje.
“Të dyja palët po përpiqen të gjejnë një metodë hakmarrjeje, që do të jetë mjaft e fortë për të thënë se po bëjnë diçka, por jo për të përshkallëzuar situatën në një luftë në shkallë të gjerë”, thotë për Zërin e Amerikës Amos Yadlin, ish drejtor i Inteligjencës Ushtarake izraelite.
Ai thotë se të dy sulmet ndihmojnë në rindërtimin e imazhit të Izraelit si një vend i fortë me aftësi të larta zbulimi, një imazh që u shkatërrua pas sulmit të Hamasit më 7 tetor në Izraelin jugor.
Haniyeh, i cili ishte udhëheqës politik i Hamasit, kishte jetuar në Katar. Në prill, një sulm ajror izraelit vrau tre djemtë e tij në Gazë. Palestinezët thonë se vdekja e tij do t’i bëjë ata më të përkushtuar për të luftuar kundër Izraelit.
“Pushtuesit gabimisht besojnë se duke vrarë udhëheqësit e rezistencës palestineze do të dëmtojnë fuqinë e rezistencës. Ne kemi përjetuar vrasjen e disa udhëheqësve palestinezë, por rezistenca jonë është rritur dhe ka fituar më shumë fuqi për të vënë në shënjestër pushtimin izraelit. Kjo do të ndodhë pas vrasjes së (drejtuesit të Hamasit) Haniyeh”, thotë Osama al Dahbouh, banor i Gazës.
Vrasja ndodhi ndërsa vazhdojnë negociatat për arritjen e një armëpushimi në mes të Izraelit dhe Hamasit. Kjo marrëveshje do të mundësonte lirimin e disa prej 115 pengjeve që mbahen nga Hamasi në Gazë. Disa analistë thonë se vrasja e Haniyeh-es mund ta dobësojë Hamasin.
“Hamasi në Gazë po humbet aftësitë ushtarake. Grupi do të mbetet i fuqishëm me mundësinë që të pengojë banorët e Gazës të bashkëpunojnë me Izraelin. Por, në cilësinë e organizatës ushtarake, Izraeli gradualisht po e bën atë të parëndësishme”, thotë Gjenerali Yaakov Amidror, ish Këshilltar i Sigurisë Kombëtare të Izraelit.
Megjithatë, ai thotë se grupi tjetër, Hezbollahu, mbetët një organizatë e fuqishme ushtarake dhe përbën një rrezik serioz për Izraelin. Ka gjithashtu shqetësime se Teherani mund t’i përgjigjet drejtpërdrejt Izraelit pas vrasjes së drejtuesit të Hamasit në Iran. Në muajin prill Irani lëshoi qindra raketa ndaj Izraelit ndërsa ka nxitur edhe grupet që i mbështet si grupi Houthi në Jemen dhe Hezbollahun në Liban që të kryejnë sulme ndaj Izraelit./Voa/
Grupi Balkanweb
Burimi informacionit @BalkanWeb: Lexo me shume ne : Bota Sot News botasot.co