Të paktën 19 persona u vranë në Meksikë, duke përfshirë katër persona nga Guatemala, në një përleshje mes dy karteleve të drogës në shtetin jugor të Chiapas, njoftoi dje, të hënën, Ministria e Sigurisë.

“Brenda një kamioni me mallra janë gjetur 14 persona të vrarë me armë zjarri, dy të tjerë në kabinë, dy në rrugë dhe një tjetër në distancë rreth 100 metra”, sqarohet në njoftim. Më parë u bë e ditur se të vdekurit ishin 20.

Incidenti ndodhi të premten e kaluar në qytetin La Concordia, disa orë me makinë nga kufiri me Guatemalën.

Sipas ministrisë, hetimet e para tregojnë se bëhet fjalë për një “konflikt” mes kartelit Sinaloa, një nga më të fortët në vend, dhe një fraksioni rival të quajtur “Karteli i Chiapas dhe Guatemalës”.

Autoritetet theksojnë se dy organizatat kriminale “po pretendojnë kontrollin e kësaj zone kufitare” dhe, sipas njoftimit, “u konstatua se të paktën katër nga personat e vrarë mbanin karta identifikimi të lëshuara nga qeveria e Guatemalës”.

Pasi u alarmuan të shtunën për praninë e trupave në një rrugë rurale, forcat e rendit zbuluan të vrarët brenda një kamioni mallrash, thanë ata.

Sipas të njëjtit burim, në zonën ku u zhvilluan këto ngjarje, u bënë arrestime të personave të lidhur me “kontrabandën e drogës, trafikimin e qenieve njerëzore dhe armëve”.

Fundjavën e kaluar, qeveria federale urdhëroi vendosjen e 1200 trupave për të forcuar sigurinë përgjatë kufirit me Guatemalën./Protothema/ 

Burimi informacionit @BalkanWeb: Lexo me shume ne : Bota Sot News botasot.co