![“Nder i madh të shërbeja si ministër i Brendshëm, në 1 vit shënuam disa arritje”/ Balla i dorëzon detyrën, Ervin Hoxha: Çojmë përpara reformën në polici, luftë krimit! 2 nder i madh te sherbeja si minister i brendshem ne 1 vit shenuam disa arritje balla i dorezon detyren ervin hoxha cojme perpara reformen ne polici lufte krimit](https://botasot.co/wp-content/uploads/2024/07/nder-i-madh-te-sherbeja-si-minister-i-brendshem-ne-1-vit-shenuam-disa-arritje-balla-i-dorezon-detyren-ervin-hoxha-cojme-perpara-reformen-ne-polici-lufte-krimit.jpg)
Ervin Hoxha, ka marrë zyrtarisht detyrën e ministrit të Brendshëm, në një ceremoni të zhvilluar në Ministrinë e Brendshme, ku morën pjesë zyrtarë e titullarë të institucioneve të varësisë.
Hoxha tha se një pjesë e konsiderueshme e karrierës së tij lidhet ngushtësisht me detyra në Ministrinë e Brendshme dhe Policinë e Shtetit, fillimisht si punonjës, drejtues e tashmë titullar, çka rrit ndjenjën e përgjegjësisë për këtë detyrë.
Ai listoi shkurtimisht disa prioritete si ministër i Brendshëm, duke nisur nga reformimi gjithëpërfshirës në zinxhirin drejtues të Policisë së Shtetit, zhvillimin teknologjik për të parandaluar ngjarjet kriminale e rritur sigurinë publike, apo përmirësimin e sjelljes dhe etikën e trupës policore në raport me qytetarët.
“Ligji i ri Policisë së Shtetit do na mundësojë realizimin e një reforme të thellë në një ristrukturim dhe efikasitet për shërbimet e policisë, në kontrollin e territorit”, theksoi ministri Hoxha.
Duke e konsideruar udhërrëfyes, dosjen e dorëzimit të detyrës nga Ministri paraardhës, ai shprehu gjithë angazhimin personal e profesional në detyrën e re.
Ish-ministri i Brendshëm Balla e konsideroi nder të madh të shërbente si ministër i Brendshëm. Ai renditi disa arritje në këtë një vit në detyrë, duke nisur nga miratimi i disa akteve ligjore me rëndësi, si ai për Policinë e Shtetit, ligji për Gjendjen Civile, apo finalizimin e projektligjit për rikuperimin e aseteve të fituara nga krimi. Më tej përmendi rezultatet konkrete si Paketa e Sigurisë në Shkolla, apo operacionet kundër narkotikëve e armëmbajtjes pa leje. Procesi i vetëpastrimit të Policisë, sipas Ballës po jep çdo ditë rezultate.
(BalkanWeb)
Grupi Balkanweb
Burimi informacionit @BalkanWeb: Lexo me shume ne : Bota Sot News botasot.co