Një person ka vdekur dhe dy të tjerë janë ende të zhdukur pasi një shpellë akulli u shemb në Islandën juglindore ndërsa një grup turistik po vizitonte zonën, tha policia të hënën.

Një grup prej 25 personash të “disa kombësive” ishin në një turne të organizuar në akullnajën Breidamerkurjokull së bashku me një udhërrëfyes, kur shpella u shemb, tha policia në një deklaratë.

Policia tha se katër persona kanë ngecur nën akull dhe dy prej tyre janë gjetur.

Të dielën, policia e Sudurland tha se dy personat e rikuperuar ishin plagosur rëndë, por shtoi në një deklaratë të mëvonshme herët të hënën se njëri prej tyre ishte “deklaruar i vdekur në vendngjarje”.

Personi tjetër u transportua në spital me helikopter dhe ndodhej në gjendje të qëndrueshme.

Shërbimet e shpëtimit filluan një operacion kërkimi për dy të zhdukurit të dielën dhe po vazhdonin kërkimet të hënën.

“Një numër i madh shpëtimtarësh dhe reagues kanë marrë pjesë në operacion,” tha policia, duke shtuar se kushtet ishin “të vështira”.

Autoritetet vendosën të pezullojnë përkohësisht kërkimin të dielën në mbrëmje pasi u bë shumë errët.

Akullnaja ku ndodhi aksidenti është pranë lagunës akullnajore Jokulsarlon, një nga destinacionet turistike më të njohura të Islandës.

(A.A/BalkanWeb)

Burimi informacionit @BalkanWeb: Lexo me shume ne : Bota Sot News botasot.co