Përfaqësuesja Shpresa vazhdon të jetë ekipi kombëtar i Shqipërisë i cili sistematikisht ka më shumë vajtje-ardhje lojtarësh, me listat që pësojnë vazhdimisht ndryshime të mëdha në krahasim me momentin kur shpallet e para për situata nga më të ndryshmet. Kjo ka ndodhur edhe me këtë grumbullim ku kuqezinjtë po përgatitin dy miqësore me Moldavinë që do të luhet në vendin tonë.
Trajneri Bushi ka bërë publike pak ditë më parë listën e tij, por ndryshimet brenda saj kanë qenë të vazhdueshme. Një ditë më parë, ekipit iu bashkua sulmuesi i Leçes Dario Daka, ndërsa tashmë pjesë e skuadrës mësohet se do të bëhet edhe sulmuesi i cili luan në Serinë B, Stiven Shpendi.
Ky i fundit, i huazuar nga Empoli te Karrareze, ka qenë vazhdimisht pjesë e ekipit U21 kuqezi, por ishte lënë jashtë nga Bushi fillimisht në listën e tij. Megjithatë, nga përtej Adriatikut bëjnë të ditur se ftesa i ka mbërritur lojtarit në klub. Kësisoj, njëri nga dy binjakët Shpendi, do të veshë fanellën kuqezi për të luajtur me U21 gjatë kësaj pauze të kombëtareve.
PANORAMASPORT.AL
