Shefi i policisë së El Salvador është mes 9 personave që humbën jetën pasi helikopteri ushtarak ku po udhëtonin u rrëzua në vendin e Amerikës Qendrore.
Drejtori i Përgjithshëm i Policisë, Mauricio Arriaza po shoqëronte një të dyshuar për një skemë mashtrimi miliona dollarëshe në kryeqytet, San Salvador, kur helikopteri u rrëzua pak pas ngritjes.
I arrestuari Manuel Coto, ish-drejtori i arratisur i bankës, ishte akuzuar për përfshirje në përvetësimin e 35 milion dollarëve nga një bashkim krediti në El Salvador.
Presidenti Salvadorian Nayib Bukele u shpreh në një postim në X se përplasja nuk duhet të konsiderohej një aksident dhe urdhëroi një hetim.
Presidenti Bukele tha se flamujt do të qëndrojnë në gjysmështizë për tre ditë për nder të Arriaza.
Presidenti e kishte emëruar atë si shef policie në vitin 2019. Nën Bukele, shkalla tronditëse e vrasjeve në vend ra, por grupet e të drejtave të njeriut thonë se siguria ka pasur kosto, me disa të dyshuar të arrestuar në mënyrë arbitrare dhe që iu janë mohuar gjykimet e drejta.
Presidenti Bukele vlerësoi shefin e ndjerë të policisë si “një pjesë thelbësore e sjelljes së paqes dhe sigurisë për popullin tonë”, ndërsa theksoi se do të kërkonte ndihmë ndërkombëtare për të hetuar shkaqet e aksidentit ajror.
Forcat e Armatosura të El Salvadorit thanë se helikopteri UH-1H u rrëzua pranë Pasaquina-s, rreth 10 km nga kufiri me Hondurasin.
Sipas mediave lokale, në helikopter udhëtonte shefi i policisë Arriaza, Coto dhe një ekip gazetarësh. Të gjithë personat që ishin në bord vdiqën në aksidentit ajror, tha ushtria.
Arriaza kishte udhëtuar në kufirin e Honduranit për të marrë Manuel Coto në paraburgim.
Zyrtarët e Hondurasit thanë se policia kishte kapur ish-drejtorin e bankës teksa po përpiqej të dilte në SHBA me ndihmën e një kontrabandisti njerëzish.
Lajmi për arrestimin e tij shkaktoi habi dhe konfuzion pasi nuk dihej që ai kishte qenë në arrati. Në fakt, autoritetet Salvadoriane kishin njoftuar në korrik se Coto ishte arrestuar në Panama. Nuk është e qartë se si ai shkoi në Honduras.
Coto ishte një nga 32 personat e akuzuar për përvetësim dhe pastrim parash për zhdukjen e 35 milionë dollarëve nga arkat e unionit të kreditit COSAVI.
Prokurori i Përgjithshëm i El Salvadorit akuzoi grupin për nxjerrjen e parave nga kursimet e njerëzve dhe përdorimin e tyre për të blerë banesa dhe makina luksoze, ndër të tjera.
Në lidhje me rastin në total janë ndaluar 15 persona, mes tyre janë edhe prindërit e Manuel Coto.
NDIQE LIVE “PANORAMA TV” © Panorama.al Burimi informacionit @Panorama.al: Lexo me shume ne :bota sot www.botasot.co
