Zëdhënësi i Kremlinit, Dmitry Peskov, është shprehur se Rusia e sheh kandidaten demokrate për president të SHBA-së, Kamala Harris, si një kundërshtare më të parashikueshme se sa republikani Donald Trump, megjithëse në çdo rast Moska nuk sheh asnjë perspektivë për përmirësimin e marrëdhënieve me Uashingtonin.
Në një intervistë me Pavel Zarubin, një gazetar i afërt me Kremlinin, Peskov dukej se hodhi poshtë mburrjen e Trump se ai mund t’i jepte fund luftës në Ukrainë brenda një dite nëse ai rizgjidhej president në zgjedhjet e nëntorit në SHBA.
Përpara se presidenti Joe Biden të largohej nga gara zgjedhore e nëntorit dhe të mbështeste Harris-in, presidenti rus Vladimir Putin tha se Moska e preferonte Bidenin në vend të Trump, duke e përshkruar të parën si një politikan të shkollës së vjetër.
Me Biden jashtë garës, Zarubin e pyeti Peskovin: “Pra, kush është kandidati i preferuar tani?”
Peskov u përgjigj duke qeshur: “Ne nuk preferojmë asnjë kandidat. Por, sigurisht, demokratët janë më të parashikueshëm. Dhe ajo që Putin tha për parashikueshmërinë e Biden vlen për pothuajse të gjithë demokratët, duke përfshirë edhe znj. Harris”.
Edhe pse ata kanë deklaruar se zgjedhjet presidenciale në SHBA janë një çështje e brendshme e SHBA-së, Putin dhe Peskov kanë shprehur pikëpamje të ndryshme për të në periudha të ndryshme.
Në shkurt, për shembull, Putin lavdëroi Biden për parashikueshmërinë e tij, por gjithashtu preku çështjen e ndjeshme të aftësisë së tij mendore për presidencën në komente që dukej se ishin përçmuese për presidentin amerikan.
Në qershor, presidenti rus tha se Moskës nuk i interesonte se kush do të ishte presidenti i ardhshëm i SHBA-së, por theksoi se sistemi gjyqësor amerikan po përdorej qartë për të dëmtuar politikisht Trump.
Peskov, në intervistën e transmetuar sot, theksoi se hapat e ndërmarra nga SHBA për të “cenuar interesat e vendit tonë” kanë tejkaluar kufijtë e pranueshëm.
“Marrëdhëniet dypalëshe janë në nivelin më të ulët historik, pa asnjë perspektivë për një fillim përmirësimi”, tha ai.
Zëdhënësi i Kremlinit vuri në dukje gjithashtu se nuk ka “shkop magjik” për të zgjidhur luftën në Ukrainë brenda natës në mënyrën se si premtoi Trump.
Ai tha se është një “fantazi” të mendosh se presidenti i ardhshëm i SHBA do të shpallte në fjalimin e tij të inaugurimit se Uashingtoni po i jep fund ndihmës ushtarake për Ukrainën dhe bën thirrje për negociata paqeje dhe se kjo do të ndryshonte qëndrimin e Kievit.
NDIQE LIVE “PANORAMA TV” © Panorama.al Burimi informacionit @Panorama.al: Lexo me shume ne :bota sot www.botasot.co
