Bayern Munich shfaqi shenja jetë në Londër, në Champions League, i vetmi trofe ku janë në lojë. Barazimi 2-2, por mbi të gjitha loja e prodhuar, i jep besim për ndeshjen e kthimit kundër Arsenal. Nga drejtuesit e klubit, te trajneri Tuchel dhe te lojtarët, të gjithë ishin të bashkuar për këtë kaluar këtë pengesë, detaj ku u ndal edhe Max Eberl, drejtori sportiv i Bayern Munich:

“U pa qartë në Emirates. Skuadra është me Tuchel, por kjo nuk ndryshon asgjë në lidhje me të ardhmen e tij, në verë gjithçka është e vendosur”, u shpreh drejtori i Bayern.

Të dalë prej kohësh nga gara për titull në Bundesligë, Bayern i ka përqendruar të gjithë forcat në Champions League, por për ndeshjen e kthimit Tuchel duhet të bëjë llogaritë pa Serge Gnabry, autorin e golit të parë. Klubi gjerman me anë të një reagimi për mediat saktësoi se Gnabry ka pësuar një tërheqje muskulore në kofshën e majtë. Nuk është përcaktuar ende koha e rikuperimit, por është thuajse e pamundur që Gnabry të jetë në fushë të mërkurën, për ndeshjen e kthimit.

(BalkanWeb)

Burimi informacionit @BalkanWeb: Lexo me shume ne : Bota Sot News botasot.co