Zgjidhja me dy shtete është e vetmja mënyrë për të garantuar një paqe të drejtë dhe të qëndrueshme në Lindjen e Mesme, tha sot ministri i Jashtëm spanjoll, Jose Manuel Albares, raporton Anadolu.

Duke folur në një konferencë shtypi përpara fillimit të një takimi ministror në Madrid, Albares tha se një bashkëjetesë e sigurt dhe paqësore e izraelitëve dhe palestinezëve do të ishte e mundur përmes formimit të një shteti të pavarur palestinez që do të përfshinte Gazën, Bregun Perëndimor dhe Kudsin Lindor si kryeqytet i tij.

“Kjo është ajo që e motivoi Spanjën për njohjen më 28 maj të Palestinës si shtet, së bashku me Norvegjinë, Irlandën dhe Slloveninë”, tha ai.

Duke shprehur mbështetje për përpjekjet për të siguruar një marrëveshje urgjente armëpushimi për Gazën, Albares shtoi: “Nuk ka asnjë justifikim për të vazhduar shtyrjen e marrëveshjes dhe për të zgjatur vuajtjet e miliona civilëve të pafajshëm”.

Izraeli ka vazhduar ofensivën e tij brutale në Gaza që nga sulmi tetorin e kaluar nga grupi palestinez Hamas, pavarësisht nga një rezolutë e Këshillit të Sigurimit të OKB-së që kërkon armëpushim të menjëhershëm.

Më shumë se 41.100 njerëz, kryesisht gra dhe fëmijë, janë vrarë që atëherë dhe mbi 95.100 janë plagosur, sipas autoriteteve lokale shëndetësore.

Sulmet izraelite kanë zhvendosur pothuajse gjithë popullsinë e territorit, krahas një bllokade të vazhdueshme që ka çuar në mungesa të mëdha të ushqimit, ujit të pastër dhe ilaçeve.

Izraeli përballet me akuza për gjenocid për veprimet e tij në Gaza në Gjykatën Ndërkombëtare të Drejtësisë.

Burimi informacionit @BalkanWeb: Lexo me shume ne : Bota Sot News botasot.co