Balenat që kalojnë në menopauzë jetojnë më gjatë, duke u mundësuar atyre të kujdesen për familjen e gjerë, kanë zbuluar shkencëtarët. Hulumtimi jep të dhëna për origjinën e menopauzës, e cila gjendet vetëm tek njerëzit dhe një pjesë e vogël e gjitarëve detarë. Në aspektin evolucionar, ndalimi i riprodhimit në gjysmë të jetës është një enigmë biologjike. Shumica e specieve riprodhohen derisa të vdesin, duke maksimizuar në dukje shanset për t’i kaluar gjenet e tyre brezit të ardhshëm.

Dr Sam Ellis, nga Universiteti i Exeter, i cili udhëhoqi studimin, tha se në disa specie balenash evolucioni kishte zgjedhur një jetëgjatësi më të gjatë të femrës, në mënyrë që nënat dhe gjyshet të mund të vazhdonin të mbështesin familjen e tyre shumë kohë pas përfundimit të jetës riprodhuese.

“Ne shohim të njëjtat modele në shoqëritë njerëzore, ku gratë kanë një periudhë riprodhuese të ngjashme me atë të të afërmve tanë më të afërt primatët, por kanë një jetëgjatësi totale shumë më të gjatë,” tha ai. Gjetjet, të publikuara në revistën “Nature” dhe cituar nga BBC, janë pjesë e një përpjekjeje prej dekadash për të zgjidhur misterin e gjatë evolucionar.

Një ekip i udhëhequr nga shkencëtarët në Universitetin e Exeter krahasoi jetëgjatësinë e 32 llojeve të balenave. Ata zbuluan se femrat e pesë llojeve që kanë “menopauzë” jetuan rreth katër dekada më gjatë se balenat e tjera me dhëmbë. Kjo u lejon atyre të kalojnë më shumë kohë, duke rritur kështu mbijetesën e pasardhësve të tyre.

Për shkak se ata vetë nuk kanë më pasardhës, ka më pak gojë për të ushqyer. Vetëm specie të tilla si orka ose balena vrasëse, që jetojnë në grupe familjare të lidhura ngushtë me struktura komplekse shoqërore kalojnë në menopauzë. Rebecca Seer, profesoreshë e popullsisë dhe shëndetit, në Shkollën e Higjienës dhe Mjekësisë Tropikale në Londër, e cila nuk ishte e përfshirë në studim, tha: “Studimi i balenave sugjeron se është e besueshme që edhe te njerëzit, të njëjtat presione selektive nënkuptojnë se Menopauza evoluoi për të prodhuar gjyshe të dobishme dhe për të zvogëluar konkurrencën riprodhuese midis brezave.”

Burimi informacionit @BalkanWeb: Lexo me shume ne : Bota Sot News botasot.co