Dy persona tashmë janë vënë në shënjestër të hetuesve evropianë për një rast të dyshuar korrupsioni

Në harkun e dy ditëve janë bërë dy hetime nga prokuroria e Bashkimit Evropian që tronditin BEI-në, Bankën Evropiane të Investimeve. Akuzat për korrupsion, shpërdorim dhe përvetësim kanë goditur drejtorin e mëparshëm të institutit dhe një ish-zyrtar, ndonëse për momentin nuk dihen detaje.

Sipas asaj që u raportua nga gazeta e specializuar në çështjet evropiane Politico, zyra e prokurorit të BE-së kishte hapur çështje kundër “dy personave të dyshuar për korrupsion dhe abuzim me ndikimin, si dhe për shpërdorim “të fondeve evropiane”. Hetimi nisi pas një raporti nga Olaf, agjencia e BE-së kundër mashtrimit, dhe ka të bëjë me një kompensim të tepruar të paguar për një ish-punonjës të bankës.

I dyshuari i parë është Werner Hoyer, një gjerman që ishte kreu i degës së kreditit të Unionit (me qendër në Luksemburg) deri në dhjetorin e kaluar, i zëvendësuar nga spanjollja Nadia Calvino. Hoyer ka firmosur paketën e kompensimit për punonjësin në fjalë, por i interesuari siguron se nuk ka marrë pjesë në negociatat për shumën e parave.

Sipas zbulimeve, hetuesit kanë kontrolluar shtëpinë e Hoyer, i cili nga ana e tij ka mohuar çdo keqbërje. “Akuzat kundër meje janë absolutisht absurde dhe të pabaza”, tha ai në një deklaratë me email për Politico.

“Tani pres që ato të hetohen dhe sqarohen plotësisht dhe kërkoj nga BEI që të bashkëpunojë plotësisht me Prokurorinë. Gjithashtu jam duke bashkëpunuar plotësisht me Prokurorinë dhe kërkoj që faktet të sqarohen plotësisht”, shtoi ai.

Personi i dytë i përfshirë në hetime është Henry von Blumenthal, të cilit, ashtu si Hoyer, tashmë i është kontrolluar banesa. “Ka pasur kërkime, por ne nuk kemi një ide të qartë se për çfarë akuzohet klienti im, përveç faktit që e kuptojmë se ka të bëjë me largimin e tij nga banka,” tha avokati i von Blumenthal.

Burimi informacionit @BalkanWeb: Lexo me shume ne : Bota Sot News botasot.co