![Tedi Blushi: Zbulimi se Shqipëria ka nisur kontenierë me lëndë të rrezikshme në Kinë, prova më e re se Rama është përfshirë në trafik ndërkombëtar të mbetjeve toksike 2 tedi blushi zbulimi se shqiperia ka nisur konteniere me lende te rrezikshme ne kine prova me e re se rama eshte perfshire ne trafik nderkombetar te mbetjeve toksike](https://botasot.co/wp-content/uploads/2024/08/tedi-blushi-zbulimi-se-shqiperia-ka-nisur-konteniere-me-lende-te-rrezikshme-ne-kine-prova-me-e-re-se-rama-eshte-perfshire-ne-trafik-nderkombetar-te-mbetjeve-toksike.jpg)
Sekretari i Përgjithshëm i Partisë së Lirisë Tedi Blushi, me anë të një postimi në rrjetet sociale shkruan se zbulimi se Shqipëria ka nisur konteinierë me lëndë të rrezikshme në Kinë është prova më e re se Rama është përfshirë në trafik ndërkombëtar të mbetjeve toksike.
“Zbulimi i radhës se Shqipëria ka nisur kontenierë me lëndë të rrezikshme edhe në Kinë, përveç Tajlandës, është prova më e re se Edi Rama është përfshirë drejtpërdrejt në trafik ndërkombëtar të mbetjeve toksike.
100 kontenierë drejt Tajlandës dhe 115 kontenierë drejt Kinës nuk kanë asnjë shans të ngarkohen në Portin e Durrësit, pa përfshirjen e drejtpërdrejtë të shtetit, të institucioneve më të larta të sigurisë, të strukturave përgjegjëse kufitare, të doganave, portit dhe Policisë.
Në asnjë rast nuk mundet që një operacion i tillë kriminal me përfshirjen e shumë aktorëve, për transportimin e mbetjeve toksike kërcënuese për shëndetin e qytetarëve shqiptarë dhe të vendeve të tjera, të ndodhë pa autorizimin e një seri agjencive, që paguhen nga taksat tona, pikërisht për të kontrolluar çdo produkt, të gjitha mbetjet, pasojat e tyre në mjedis dhe destinacionin e tyre final.
Ky shtet që nuk toleron një fugon me shalqi që niset nga Lushnja pa faturë e dokumentacion, i paskan kaluar si miu nën hundë mijëra ton mbetje toksike që u ngarkuan në Elbasan, u transportuan drejt Durrësit dhe u imparkuan në anije, në portin që presupozohet është më i sigurti i një vendi anëtar të NATO-s.
Askush veç Edi Ramës nuk ka fuqinë të komandojë të gjithë shtetin për të mbyllur sytë dhe hapur dyert e Portit të Durrësit, ditën për diell, për këtë aktivitet të mirëorganizuar kriminal të mafias ndërkombëtare të plehrave.
Skandali thellohet kur pjesë e këtij operacioni bëhet edhe organizata kriminale e drejtësisë, SPAK që prej ditësh duhet të ishte në zyrat e Portit të Durrësit për të sekuestruar materiale dhe prova dhe duhet të kishte urdhëruar arrestime në nivelet më të larta të Qeverisë për skandalin e tmerrshëm të mbetjeve toksike.
Në Narkoshtetin e Edi Ramës “afërmendsh” kjo nuk mund të ndodhë, sa kohë korrupsioni skizofrenik cilësohet “krim intelektual” dhe kur çirakut në krye të SPAK-ut, Altin Dumani i merret goja, i erren sytë dhe as guxon t’i përmendë emrin Kryeministrit kur del në aferat e tmerrshme ku është përfshirë.
Askush nuk pret drejtësi nga Ramaforma dhe as transparencë e përgjegjësi nga Narkoshteti.
Hedhja sa më parë në koshin e plehrave të Qeverisë së inceneratorëve fantazmë është e vetmja zgjidhje”, shkruan Blushi.
(Balkanweb)
Grupi Balkanweb
Burimi informacionit @BalkanWeb: Lexo me shume ne : Bota Sot News botasot.co