Kryeministri Edi Rama iu është përgjigjur skeptikëve sa i takon sezonit turistik që po kalon Shqipëria. Nga Dhërmiu, Rama bëri publike shifrat e muajit korrik për numrin e pushuesve që kanë hyrë në vendin tonë. Kreu i qeverisë tha se përmes aeroportit të Rinasit në Shqipëri kanë hyrë muajin e kaluar 1.2 milionë turistë, 350 mijë më shumë krahasuar me korrikun 2023.
“Nga aeroporti kanë hyrë thuajse 1 milionë e 200 mijë pasagjerë. E dini sa më shumë se sa vjet? Mbi 350 mijë më shumë. Madje këtë korrik është thyer edhe një rekord tjetër, ai i hyrjeve në një ditë të vetme: 44 mijë! Aeroporti ka arritur të operojë deri në 252 fluturime në ciklin e 24 orëve, një volum marramendës dhe i paimagjinueshëm deri pak vite më parë. Fatmirësisht për shifrat e aeroportit nuk mund të thonë dot gjë as ato gojët me qime të atyre që nuk pushojnë u zbraz Shqipëria, edhe nga shqiptarët tani, edhe nga turistët, sepse aeroporti i Tiranës po mbush vitin në krye të klasifikimit Europian për rritjen relative me vitet paraardhëse. Ndërsa në vlerë absolute, numër pasagjerësh për numër pasagjerësh, Tirana e ka spostuar në vendin e dytë aeroportin e Beogradit, i cili historikisht ka qenë i pari dhe absolut në këtë rajon”, tha Rama.
[embedded content]
Hyrjet nga Kosova kanë qenë temë debati në media dhe rrjete sociale. Rama i quan teori keqdashëse dhe zero me xhufka zërat që pretendojnë se shqiptarët e Kosovës kanë braktisur Shqipërinë këtë vit.
“Po edhe shifrat e hyrjeve në Morinë, që i tregon regjistri elektronik i pagesës së autostradës, ku mund lexohet çdo hyrje tregojnë se këtë vit kanë hyrë 175 mijë automjete më shumë se sa vjet, ndërsa në korrik 3 mijë më shumë, se korrikun e shkuar. Pra edhe ajo teoria keqdashëse e përhapur këtë sezon me teori të tjetra për shqiptarët e Kosovës që e paskan braktisur Shqipërinë, është një zero me xhufka“, tha Rama.
Për vendin, vijoi Rama, ky sezon turistik do të jetë më i mbarë se i vitit të kaluar kur u regjistruan 10 milionë turistë në 12 muaj, ndërsa theksoi se objektivi mbetet “Shqipëria 2030”, kampionia e padiskutueshme e turizmit dhe jo vetëm e turizmit në rajon.
(BalkanWeb)
Grupi Balkanweb
Burimi informacionit @BalkanWeb: Lexo me shume ne : Bota Sot News botasot.co
