Pas rënies së Bashar al-Assad në Siri, Bullgaria po përpiqet të dëbojë azilkërkuesit sirianë duke i shtyrë ata që të nënshkruajnë dokumente të “kthimit vullnetar”, në disa raste edhe me përdorimin e dhunës.
No Name Kitchen (NNK), një organizatë humanitare që punon me emigrantët në Ballkan, ka mbledhur prova të rritjes së ngacmimit të popullit sirian në kufijtë evropianë që kur forcat e armatosura të opozitës siriane rrëzuan familjen Assad, duke i dhënë fund një regjimi të përgjakshëm 54-vjeçar.
Raporti i NNK, i shqyrtuar nga The Guardian, përfshin dëshmi, fotografi dhe dokumente se si Bullgaria po përpiqet të riatdhesojë mijëra azilkërkues sirianë, duke i nënshtruar ata në pyetje të gjera rreth perspektivave të tyre për Sirinë për të justifikuar refuzimin e pretendimeve të tyre.
Prova të mëtejshme u ndanë me NNK nga një OJQ holandeze pro imigracionit, MiGreat, në lidhje me ngacmimin e azilkërkuesve në Holandë.
Mësohet se Austria tashmë po përgatit një program “riatdhesimi dhe dëbimi” në Siri.
Më pak se një javë pas rrëzimit të Asadit, qeveria e vendit e udhëhequr nga konservatorët tha se do t’u ofronte refugjatëve sirianë shumën prej 1,000 euro për t’u kthyer në atdheun e tyre.
Koordinatorja e raportimit të dhunës në NNK, Esme Smithson Swain, tha: “Dëshmitë që kemi marrë nga e gjithë Evropa janë thellësisht shqetësuese. Rënia e regjimit të Assadit ka dhënë një pretekst për shtetet e BE-së për të errësuar politikat armiqësore të migracionit. BE-ja duhet të pranojë se rënia e një diktatori nuk fshin konflikte dekadash”.
