Kremlini mohon bisedën telefonike mes Putinit dhe Trumpit, por zëdhënësi i presidentit të zgjedhur thjesht përgjigjet se “ne nuk komentojmë bisedat e tij private”. Djali i kreut të ardhshëm të Shtëpisë së Bardhë, Don Junior, paralajmëron se për rreth tridhjetë ditë udhëheqësi ukrainas Zelensky “do të humbasë paratë e xhepit”, megjithatë burime me njohuri të drejtpërdrejta të dosjes konfirmojnë se babai po punon në mënyrë aktive për t’i dhënë fundit luftës, me një zgjidhje të pranueshme për Kievin, dhe synon të ketë një kuadër referimi deri në betimin e 20 janarit, për të paktën hapjen e negociatave.
Washington Post zbuloi të dielën se Vladimir dhe Donald folën të enjten e kaluar, kur udhëheqësi rus e uroi për fitoren në zgjedhje. Kolegu i tij amerikan i tha të mos provokonte një përshkallëzim në Ukrainë, të dy folën shkurt për territoret e diskutueshme dhe Trump shprehu interesin e tij për të folur përsëri së shpejti, ndoshta për të hyrë në më shumë detaje.
Dje zëdhënësi i Kremlinit, Peskov, deklaroi se ky informacion është “trillim i pastër”. Sipas tij “nuk ka pasur asnjë bisedë. Lajmi është krejtësisht i rremë”. Steven Cheung, zëdhënësi i kreut të ardhshëm të Shtëpisë së Bardhë, u përgjigj: “Ne nuk komentojmë thirrjet private midis Presidentit Trump dhe liderëve të tjerë botërorë”.
Si për të thënë se biseda u zhvillua, por nuk ishte publike, siç kishte ndodhur tashmë në raste të ndryshme vitet e fundit mes Putinit dhe Trumpit. Kështu që lajmi nuk duhej të dilte dhe nuk ka nevojë të komentohet më tej. Agjencia Reuters, megjithatë, shkroi se kishte dëgjuar burime që e konfirmonin, ndërsa Washington Post e shpjegoi mohimin e Moskës me sikletin për ta pranuar atë dhe mbi të gjitha me qëllimin për të mos konfirmuar, se presidenti i ardhshëm amerikan këshilloi kolegun e tij rus të mos përshkallëzonte operacionet ushtarake në Ukrainë.
Don junior publikoi një video në të cilën shihet Zelensky me babanë e tij dhe poshtë shënimi: “Ke 38 ditë të mbetura para se të humbasësh ndihmën në para”. Ai me sa duket e kishte fjalën kur Kolegji Zgjedhor të konfirmojë suksesin e Trumpit në zgjedhje, por kjo nuk ka domosdoshmërisht ndonjë rëndësi për perspektivat e luftës, së pari sepse Don Junior nuk luan domosdoshmërisht një rol vendimtar në këtë dosje, pasi financimi i operacioneve ushtarake nuk tregon të gjithë historinë.
Është e vërtetë që Donald në të kaluarën e ka kritikuar Zelenskyn si “shitësin më të madh në botë” dhe është ankuar për shumë para që i janë dhënë Kievit, duke u bërë thirrje evropianëve të hapin kuletat e tyre. Megjithatë, fondet dhe armët mund të vijnë në mënyra të ndryshme, më pak të kushtueshme për taksapaguesit amerikanë, pa kompromentuar ambiciet e kreut të ri të Shtëpisë së Bardhë për t’i dhënë fund konfliktit, duke shmangur në të njëjtën kohë hyrjen në histori si lideri që i dha Evropën Rusisë, pavarësisht suksesit të paraardhësve të tij në Luftën e Ftohtë kundër BRSS.
Detajet janë duke u finalizuar, por amerikanët mendojnë se Putini është i interesuar për një rrugëdalje. Është e vërtetë që muajt e fundit ka rritur sipërfaqet e pushtuara, por nuk është në prag të fitimit të luftës. Kjo dëshmohet, për shembull, nga fakti se iu desh t’i kërkonte ndihmë Koresë së Veriut, të përpiqej të ripushtonte territoret e marra nga ukrainasit në rajonin e Kurskut, sepse nuk mund të përballojë të lëvizë trupat e veta të angazhuara në Donbass dhe rajonet e tjera të pushtuara. Ekonomia po përpiqet me vështirësi të ecë përpara, pavarësisht rritjes së PBB-së, që në fakt është rezultat i mbinxehjes së shkaktuar nga shpenzimet e mëdha ushtarake, dhe për këtë arsye nuk është e sigurt që është i gatshëm të vazhdojë pushtimin “derisa në arritjen e të gjitha objektivave”, siç përsërit Peskov.
Basti i Trumpit është se duke ushtruar së bashku presionin e nevojshëm dhe duke ofruar zgjidhje në terren që i lejojnë të dalë i paturpëruar, Putini nuk është edhe aq larg pranimit të një zgjidhjeje. Alternativa do të ishte përplasja me një administratë më të paparashikueshme se ajo e Joe Biden. / bota.al
