Dy burra të dyshuar si të përfshirë në një komplot për rrëmbimin e një gjyqtari të famshëm brazilian janë vrarë në burg.

Janeferson Aparecido Mariano Gomes, i njohur më mirë si Nefo, dhe Reginaldo Oliveira de Sousa, i njohur si Re, u vranë nga të burgosurit e tjerë në një burg në shtetin Sao Paulo, kur ata mbaheshin në paraburgim.

Ata u arrestuan vitin e kaluar si pjesë e një operacioni policor të quajtur Henchman, i cili zbuloi një plan për të rrëmbyer figura të larta publike për shpërblim. Në mesin e atyre që ishin në shënjestër ishte senatori Sergio Moro, një ish-prokuror publik i cili mbikëqyri një hetim të madh korrupsioni të njohur si Operacioni Car Uash.

Sipas CNN Brasil, Nefo dhe Rê, të cilët ishin të dy 48 vjeç, u sulmuan ndërsa ishin në një “pauzë dielli” brenda kompleksit të burgut. Nefo u vra me thikë në tualete dhe Rê u vra në oborr, raporton faqja e lajmeve.

Tre të burgosur pranuan krimin dhe u dorëzuan pranë organeve të burgut. Ata u thanë zyrtarëve se i kishin vrarë burrat “për çështje hesapesh”. Të dy viktimat dhe agresorët e tyre dyshohet se i përkasin Komandës së Parë të Kryeqytetit (PCC), grupit kriminal më të fuqishëm të Brazilit.

Faqja braziliane e lajmeve UOL raporton se urdhri për të vrarë dy burrat do të kishte ardhur nga “lart” në PCC. Sipas UOL, Nefo dhe Rê ishin në shënjestër për shkak se kishin folur shumë. Ata u arrestuan në mars 2023 kur policia zbuloi planin e PCC për të rrëmbyer Sergio Moro.

Zyrtarët mendojnë se ai u veçua nga grupi kriminal sepse, gjatë kohës sa ishte ministër i drejtësisë dhe sigurisë i Brazilit, ai urdhëroi që anëtarët e rangut të lartë të bandës të transferoheshin nga burgjet më të vogla që ata kontrollonin në burgje të sigurisë maksimale.

Burimi informacionit @BalkanWeb: Lexo me shume ne : Bota Sot News botasot.co