![U lirua nga burgu me marrëveshjen e të burgosurve, Bideni pret në Shtëpinë e Bardhë kritikun e Kremlinit 2 u lirua nga burgu me marreveshjen e te burgosurve bideni pret ne shtepine e bardhe kritikun e kremlinit](https://botasot.co/wp-content/uploads/2024/08/u-lirua-nga-burgu-me-marreveshjen-e-te-burgosurve-bideni-pret-ne-shtepine-e-bardhe-kritikun-e-kremlinit.jpg)
Presidenti i Shteteve të Bashkuara, Joe Biden, u takua me figurën opozitare ruse, Vladimir Kara-Murza, dhe familjen e tij në Shtëpinë e Bardhë të enjten.
Kara-Murza u lirua nga burgu në Rusi në marrëveshjen e këmbimit të të burgosurve mes Moskës dhe disa vendeve të Perëndimit më 1 gusht.
Bideni postoi në Facebook se takimi u mbajt për “ta festuar kthimin e tij në Amerikë”, pasi ai “u burgos padrejtësisht në Rusi sepse foli kundër luftës së Rusisë në Ukrainë”. Kara-Murza ishte shënjestër e dy incidenteve me helmim, për të cilat ai e fajësoi Qeverinë e Rusisë.
Ai po vuante një dënim me 25 vjet burgim për tradhti, para se të lirohej në marrëveshjen e këmbimit. Pas lirimit, Kara-Murza tha se dallimi mes diktaturës dhe demokracisë është se në demokraci jeta e njeriut është e shenjtë.
Ai i bëri thirrje botës që të bëjë dallimin mes popullit të Rusisë dhe presidentit të këtij shteti. “Ka shumë njerëz në Rusi që janë kundër luftës, që nuk i besojnë propagandës së Kremlinit”, tha kritiku i Kremlinit./Rel/
Grupi Balkanweb
Burimi informacionit @BalkanWeb: Lexo me shume ne : Bota Sot News botasot.co