Disa njerëz janë vrarë dhe plagosur si pasojë e sulmeve ruse në pjesë të ndryshme të Ukrainës gjatë natës, njoftuan zyrtarët ukrainas më 8 shtator, pak pasi presidenti ukrainas, Volodymyr Zelensky, tha se Kievi po vazhdon të kërkojë “zgjidhje për armët me rreze të gjata veprimi” me qëllim që t’i ndalë sulmet ajrore ruse brenda Ukrainës.

Në një video të publikuar më 8 shtator, Zelensky tha se gjatë javës së fundit, ushtria ruse e ka sulmuar Ukrainën me “më shumë se 800 raketa antitanke, gati 300 dronë Shahed, dhe me mbi 60 raketa balistike”.

“Terrori mund të ndalet vetëm në një mënyrë: duke i goditur fushat ajrore të ushtrisë ruse, në bazat e tyre, dhe logjistikat e terrorizmit rus”, tha Zelensky.

Zelensky u ka kërkuar vazhdimisht vendeve aleate ta lejojnë Ukrainën t’i përdorë armët, me të cilat ato e furnizojnë, për të goditur më thellë brenda tokës ruse.

Ai e përsëriti këtë lutje edhe më 6 shtator gjatë një takimi të Grupit të Kontaktit të Mbrojtjes së Ukrainës në Gjermani.

Por, Sekretari amerikan i Mbrojtjes, Lloyd Austin, tha pas takimit se asnjë armë ushtarake si e vetme nuk është vendimtare për Ukrainën për t’u mbrojtur nga pushtimi i plotë rus, dhe se përdorimi i armëve amerikane për sulme thellë brenda në Rusi nuk do ta kthente luftën në dobi të Ukrainës.

Sipas Forcave Ajrore të Ukrainës, ushtria ruse kreu sulme natën e kaluar dhe mëngjesin e sotëm me katër raketa të telekomanduara nga rajoni Belgorod i Rusisë, si dhe me 23 dronë të prodhimit iranian, Shahed.

“Sulmet e armikut u zmbrapsën nga kundërajrorët, grupet e artilerisë mobile dhe njësitet e Forcave të Mbrojtjes së Ukrainës”, thuhet në njoftim.

Një çift i moshuar u vra nga bombardimet ruse në qytetin Sumi të Ukrainës gjatë natës, thanë zyrtarët të dielën.

“Katër persona të tjerë u plagosën, përfshirë një vajzë 2-vjeçare dhe një djalë 8-vjeçar”, tha zyra e prokurorit lokal.

Raportohet se një shtëpi është shkatërruar dhe 20 të tjera janë dëmtuar.

Të paktën një person u vra nga një sulm rus kundër një hoteli në qytetin Mikolaivka të rajonit Donjeckut, raportoi Shërbimi ukrainas i Radios Evropa e Lirë të dielën. Ekipet e shpëtimit punuan gjatë natës për të gjetur dy persona të zhdukur në vendngjarje.

Zyrtarët në kryeqytetin ukrainas, Kiev, thanë të dielën së të paktën dy persona u vranë nga një shpërthim me në një fabrikë automobilash.

“Dy persona janë vrarë, ndërsa ka mundësi që të ketë njerëz nën rrënoja”, shkroi administrata ushtarake e Kievit në Telegram, duke shtuar se ekipet e shpëtimit ndodhen në vendngjarje.

Një ndërtesë dykatëshe u “shkatërrua pjesërisht”, shkruan zyrtarët.

NDIQE LIVE “PANORAMA TV” © Panorama.al Burimi informacionit @Panorama.al: Lexo me shume ne :bota sot www.botasot.co