Në prag të vitit të ri shkollor, Kryetari i Bashkisë sën Tiranës, Erion Veliaj njoftoi hapjen e një sërë shkollave të reja, ku përmendi “Avni Rustemin”, por edhe kopshteve dhe çerdheve të reja në zonat e periferisë, si zona e Freskut, e lagjes “Rilindja”, tek Unaza e Madhe, siç është edhe zona e Liqenit të Thatë. Nga Lagjja “5 maji”, ku inspektoi punimet për lagjen e re, Veliaj nënvizoi se po merren të gjitha masat për të përballuar kërkesat e larta për regjistrim.

“Ne do të hapim edhe një sërë shkollash të reja. Mezi pres, “Avni Rustemi” është pa dyshim një shkollë në qendër të Tiranës, por kemi edhe shkolla në zonat rurale. Do të hapim disa çerdhe të reja, sidomos në zonat e periferisë, siç është zona e Freskut, e lagjes ‘Rilindja’, tek Unaza e Madhe, siç është edhe zona e Liqenit të Thatë. E di që kemi pasur një fluks të jashtëzakonshëm aplikimesh. Kur kemi marrë detyrën përpara 10 vitesh, kemi pasur më pak se 3 fëmijë në çerdhe, se asnjë nuk donte t’i çonte në çerdhe dhe kopshtet publike. Sot jemi 13 mijë fëmijë, pra jemi 10 mijë më shumë, sigurisht që kërkesa është edhe për më shumë. Kur i shoh që i heqin nga privati për t’i sjellë te publikja, do të thotë që kemi bërë diçka vërtet të mirë, megjithatë edhe në shtator do vijojmë të hapim çerdhe e kopshte të reja, sepse edhe kërkesa ka qenë e jashtëzakonshme”, u shpreh Veliaj.

Ai njoftoi se procesi i dezinfektimit do të vijojë kryesisht në shkolla, para nisjes së vitit të ri shkollor, ndërsa ftoi qytetarët të mos bëhen pjesë e histerisë që përpiqet të bllokojë punën e Bashkisë.

“Sa u përket shkollave, kam një kërkesë shumë të rëndësishme. Jemi në përgatitjet e fundit. Ne po fillojmë edhe këtu tek shkolla “Ardian Klosi” dhe shkolla të tjera, të bëjmë riparime, higjienizimin. Nëse nuk dezinfektojmë natën, aty ku mushkonjat bëjnë vezët, në ferra, në vijat e ujit, aty ku janë lulishtet, ku ka hapësira që tipikisht mushkonjat shumohen dhe vënë vezët e tyre, ne do kishim pasur një verë të tmerrshme, si ato që kemi pasur disa vite më parë. Fakti që kaluam një verë pa mushkonja do të thotë se qartazi shkenca e aplikuar në territor prodhon këtë rezultat”, tha ai.

Kreu i Bashkisë ftoi qytetarët që të përkrahin Bashkinë dhe punëtorët e Bashkisë kur i shohin që po kryejnë detyra e funksione jetike për qytetin. “Kur shkenca, OBSH, thotë që duhet të dezinfektosh këto vende, nuk mund të dalë çdo njeri me probleme të shëndetit mendor e të bllokojë makinat e Bashkisë. Kur këta kanë edhe mbështetje politike, aty kupton që një pjesë e politikës po infektohet jo nga mushkonjat, por nga këto probleme të rënda të shëndetit mendor, ku i kundërvihemi shkencës, i kundërvihemi punës, të ardhmes së qytetit. Qytetarët duhet ta dinë që është një procedurë standarde e higjienizimit të shkollave, përpara se të vijnë fëmijët. Qytetarët i ftoj të mos bëhen pjesë e histerisë, por i ftoj që të përshëndesin e përkrahin Bashkinë dhe punëtorët e Bashkisë, kur i shohin që po kryejnë detyra e funksione jetike për qytetin”, deklaroi kryebashkiaku.

Burimi informacionit @BalkanWeb: Lexo me shume ne : Bota Sot News botasot.co