Tomas Tuhel thuhet se do të përfitojë një bonus të konsiderueshëm nëse udhëheq Anglinë drejt lavdisë në Kupën e Botës FIFA 2026 në Amerikën e Veriut. 51- vjeçari ka fituar trofe me Borusian e Dortmundit, PSG-në, Çelsin dhe Bajernin e Mynihut gjatë karrierës së tij në menaxhimin e klubeve.
Ai u përcaktua në fillim të këtij muaji si njeriu i zgjedhur nga Federata e Futbollit për të marrë drejtimin nga Garet Sauthgejt, i cili u largua si trajner i Anglisë pas humbjes së skuadrës së tij nga Spanja në finalen e “Euro 2024”.
Tuhel ka nënshkruar një kontratë 18-mujore me “FA”-në dhe ai do të fitojë të paktën 7.5 milionë paund gjatë kësaj periudhe, sipas “The Sun”. Për më tepër, pretendohet se gjermani do të marrë një bonus shtesë prej 3 milionë paundësh nëse lojtarët e Anglisë i japin fund pritjes së gjatë, duke fituar Kupën e Botës për herë të parë që nga viti 1966.
Paga e raportuar e Tuhelit prej 5 milionë paundësh në vit thuhet se është dy herë më e madhe se ajo e Sauthgejtit. Sidoqoftë, Sauthgejt me sa duket kishte këmbëngulur për një bonus me vlerë 4 milionë paund, nëse ai do të ishte njeriu që sillte një triumf në Kupën e Botës. Sauthgejt e drejtoi Anglinë në dy Kupa Bote.
Në vitin 2018, ai udhëhoqi “Tre Luanët” në vendin e katërt në Rusi, ku ata u mundën nga Kroacia në gjysmëfinale. Anglia më pas u eliminua në fazën çerekfinale në Katar në 2022, duke humbur ndaj Francës. Sauthgejt gjithashtu e dërgoi Anglinë në dy finale të njëpasnjëshme të Europianit.
Skuadra e tij u mund me penallti nga Italia në finalen e “Euro 2020”, përpara se të humbiste 2-1 nga Spanja në ndeshjen e fundit në “Euro 2024”. Ndeshja e parë e Tuhelit si trajner i Anglisë pritet të jetë në mars të vitit 2025. Li Karslej, i cili ka qenë në krye të Anglisë provizorisht që nga largimi i Sauthgejtit në verë, do të drejtojë ekipin edhe në ndeshjet e Ligës së Kombeve kundër Greqisë dhe Irlandës në nëntor.
PANORAMASPORT.AL