Guvernatori i Nju Mexico në SHBA ka shpallur gjendjen e jashtëzakonshme, pasi dy zjarre kanë përfshirë një varg malesh, duke detyruar mijëra persona të evakuohen dhe duke lënë një person të vdekur.

Flakët u panë të përfshinin fshatin pranë Ruidoso brenda një rezervati, duke bërë që 7,800 banorët të largoheshin. Zjarri në South Fork, u ndez të hënën në Mescalero Apache dhe pothuajse u trefishua në madhësi gjatë natës.

Një tjetër zjarr, Zjarri i Kripës, po digjej në jug të fshatit Ruidoso. Së bashku, flakët kanë djegur rreth 20,000 hektarë. “Zjarri i tmerrshëm i South Fork Firk dhe Zjarri i Kripës kanë shkatërruar tokat dhe pronat tona dhe kanë detyruar mijëra të largohen nga shtëpitë e tyre”, tha guvernatorja Michelle Lujan Grisham. “Ne jemi duke vendosur çdo burim të disponueshëm për të kontrolluar këto zjarre.”

Zyra e saj konfirmoi një të vdekur si pasojë e zjarreve, pa dhënë detaje. Të hënën në mbrëmje, zyrtarët në Ruidoso u kërkuan banorëve që të evakuoheshin menjëherë. “Largohuni nga andej”, kërkuan ata në mediat sociale. “Mos u përpiqni të mbledhni sende ose të mbroni shtëpinë tuaj.”

Christy Hood, një agjente imobiliare në Ruidoso, i tha Associated Press se si ajo iku me burrin e saj, dy fëmijët e tyre dhe dy qentë, pa marrë as rroba apo furçë dhëmbësh. “Ndërsa po largoheshim, kishte flakë para meje dhe anash meje”, tha ajo për agjencinë e lajmeve. “Dhe të gjitha kafshët thjesht po vraponin, po përpiqeshin të dilnin jashtë.”

Rreth 500 struktura ishin shkatërruar dhe shumica besohej se ishin shtëpi, i tha BBC-së George Ducker, nga Divizioni i Pyjeve në Nju Mexico. Ducker tha se të dy zjarret ishin përhapur për shkak të kushteve atmosferike të thata dhe erës, teksa një hetim po zhvillohet në lidhje me këtë rast. Zjarret shkaktuan mbylljen e pjesshme të autostradës amerikane 70 km në jug të fshatit dhe ndërprerjet e telefonit, që kanë paraqitur një sfidë për reaguesit e urgjencës në Ruidoso.

Komunitetet aty pranë kanë hapur strehimore për të evakuuarit dhe qyteti i Rosuell ka pastruar hapësirën spitalore për pacientët që evakuohen nga spitali Ruidoso. Zjarret në Nju Mexico nuk janë të pazakonta dhe parashikimi i zjarrit për këtë vit parashikoi aktivitet normal, tha Ducker.

Por pjesë të Nju Meksikës juglindore po përjetojnë atë që klasifikohet si një “thapësirë ​​e jashtëzakonshme”. Në Kaliforni, zjarrfikësit po luftojnë me një tjetër zjarr në veri të Los Anxhelosit, ku më shumë se 15,000 hektarë tokë janë djegur dhe qindra janë detyruar të evakuohen. Zjarret vijnë ndërsa disa pjesë të SHBA-së po përballen me valën e parë të të nxehtit të sezonit.

Më shumë se 70 milionë amerikanë, rreth një në pesë persona, janë nën alarmin e të nxehtit. Disa qytete, duke përfshirë Çikagon, kanë tejkaluar temperaturat e larta rekorde të mëparshme për këtë periudhë të vitit. Paralajmërimet janë lëshuar gjithashtu në katër provinca kanadeze me një pjesë të madhe të kontinentit të përfshirë tani nga vala e të nxehtit.

(Balkanweb)

Burimi informacionit @BalkanWeb: Lexo me shume ne : Bota Sot News botasot.co