Një burrë australian është liruar pasi kaloi më shumë se 30 orë në një rrjet kanalesh nëntokësore. 38-vjeçari fillimisht u tha autoriteteve se kishte hyrë në kanalin e Brisbane për të “marrë telefonin e tij”.

Por policia e Queensland tha se ai kishte “ikur” atje, pasi makina e tij u përplas me një nga automjetet e tyre të dielën. Burri u shpëtua pasi një kalimtar telefonoi autoritetet për të raportuar se dikush kishte “ngecur” nën tokë.

Ai u trajtua për gërvishtje dhe hipotermi. Mediat lokale raportuan se burri kishte qenë në ujë deri në gjunjë përpara se zjarrfikësit të ngrinin një kapakë kullimi, duke e lejuar atë të dilte jashtë. Përpjekja e shpëtimit zgjati rreth pesë minuta, tha për BBC një zëdhënës i Shërbimeve të Emergjencave dhe Zjarrfikësve në Queensland. Banori vendas James Lingwood – i cili bëri thirrjen te autoritetet – tha për gazetën Courier Mail se ai u takua për herë të parë me burrin të dielën pasi dëgjoi një “një lloj bërtitjeje”.

“Ai dukej se ishte në rregull dhe tha se mund të dilte atje ku kishte hyrë, kështu që unë e lashë vetëm,” tha ai për gazetën. Megjithatë, të hënën, kur u kthye në të njëjtin vend, ai vendosi të vepronte pasi dëgjoi “frymëmarrje të rënduar” që tregonte se “dikush ishte në ankth”.

Të martën, policia tha se burri kishte vozitur një makinë “të dyshimtë” që përmbysi dhe goditi një automjet policie rreth orës 4:20 të dielën, duke shkaktuar dëme në të dy makinat. Asnjë punonjës policie nuk u lëndua. Makina e tij më pas u largua me shpejtësi përpara se të përfshihej në një aksident të dytë, i cili shkaktoi “lëndime të lehta” tek shoferi tjetër, thanë ata. Pak çaste më vonë, i dyshuari dyshohet se ka dalë papritur nga makina dhe ka ikur nga vendi i ngjarjes në këmbë.

“Është e mahnitshme se çfarë do të bëjnë njerëzit ndonjëherë dhe çfarë ndodh, kështu që po, ka gjithmonë surpriza”, tha për mediat të martën, komisioneri i policisë në detyrë Steve Gollschewski, kur u pyet për rastin. Policia thotë se burri, i cili është në një gjendje të qëndrueshme, tani po i ndihmon ata me hetimet e tyre.

Burimi informacionit @BalkanWeb: Lexo me shume ne : Bota Sot News botasot.co